Žyćcio za haz

Mahčyma, sychod Čarnamyrdzina aznačaje sychod u niabyt epochi sajuznaj dziaržavy. Piša Vital Taras.

«Chacieli, jak lepiej, a atrymałasia, jak zaŭždy…», «Što ni robim, atrymlivajecca KPSS, albo aŭtamat Kałašnikava», «Treba ž dumać, što razumieć», «Majo žyćcio prajšło ŭ atmaśfiery nafty i haza».

Hetyja frazy mohuć być aŭtaepitafijaj na mahile byłoha rasijskaha preḿjera Viktara Čarnamyrdzina, jaki pamior u Maskvie na 73-m hodzie žyćcia.

Ale žorstka pamyliŭsia b toj, chto paličyŭ by, što Čarnamyrdzin byŭ hetkim viesiełunom, daścipnym žartaŭnikom.

Dla taho kab vieści pa telefonie pieramovy z Šamilem Basajevym, kali toj zachapiŭ špital u Budzionaŭsku, patrebny byli zusim inšyja jakaści.

Što da Biełarusi, dyk imia Čarnamyrdzina nazaŭsiody zastaniecca ŭ źviazku ź imiem inšaha premjera — Viačasłava Kiebiča. Znakamitaja fatahrafija Siarhieja Hryca, na jakoj Kiebič i Čarnamyrdzin całujucca ŭ aŭtamašynie, biezumoŭna, zastaniecca adnym ź simvałaŭ sučasnaj historyi. Taksama, jak pierad tym — partret Brežnieva, jaki całujecca ŭ z Choniekieram.

Zrazumieła,

imia Čarnamyrdzina jašče doŭha budzie vyklikać asacyjacyi z rasijskim Hazpramam, z palitykaj rasijskaha hazavaha šantažu 

Śmierć viadomaha čałavieka, niezaležna ad acenki zroblenaha im, heta nie tolki padstava dla ŭspaminaŭ i analizu. Heta zaŭsiody niejki znak. Mahčyma, sychod Čarnamyrdzina aznačaje sychod u niabyt epochi tak zvanaj sajuznaj dziaržavy — razam z demanstrytyŭnym vykopvańniem mytnych słupoŭ na biełaruska-rasijskaj miažy, abdymkami i naskroź falšyvymi pacałunkami dy raźbitymi ab padłohu kielichami. Nasamreč, čaho chacieli — toje i atrymałasia… Ale nie budziem zabyvać, što ŭ pracesa intehracyi byli i jość dva baki. Dla taho, kab całavacca, zaŭsiody patrebnyja dvoje.

Kamientary da artykuła