Aryštavanyja čynoŭniki administracyi Centralnaha rajona Minska
Jany padazrajucca ŭ atrymańni chabaru.
U centry kryminalnaj historyi apynuŭsia jašče nie pabudavany žyły kompleks «Labiažy».
Prakuratura Minska raspačała kryminalnuju spravu pa č. 2 art. 430 KK RB (Atrymańnie chabaru) u dačynieńni da načalnika adździeła žyllovaj palityki i dyrektara UKSa administracyi Centralnaha rajona.
Pieršapačatkova apieratyŭniki mierkavali, što havorka idzie pra banalnaje padbuchtorvańnie da davańnia chabaru, jakoje čaściakom akazvajecca machlarstvam. U dadzienym vypadku
dyrektar adnoj sa staličnych firmaŭ vielmi nastojliva na praciahu niekalkich tydniaŭ «uhavorvaŭ» indyvidualnaha pradprymalnika «dać kamu treba», kab znajomaja apošniaha zmahła zaklučyć damovu dolevaha budaŭnictva kvatery ŭ budavanym žyłym domie ŭ mikrarajonie «Labiažy».Hetaje pytańnie, pa słovach padbuchtorščyka, mahli za 6 tysiač dalaraŭ stanoŭča vyrašyć viadomyja jamu słužbovyja asoby administracyi Centralnaha rajona.
Pieradača hrošaj patencyjnaj klijentki dyrektaru firmy adbyłasia ranicaj 3 žniŭnia na vulicy Maksima Tanka. Jana prachodziła pad nahladam milicyjantaŭ. Padbuchtorščyk ža akazaŭsia samym sapraŭdnym pasiarednikam. Praź niekalki hadzin kala haścinicy «Minsk» jon pieradaŭ 4 tysiačy dalaraŭ načalniku adździeła žyllovaj palityki administracyi Centralnaha rajona, jaki ŭ svaju čarhu pałovu hetaj sumy ŭručyŭ dyrektaru UKSa. Apošniaha zatrymali ranicaj 4 žniŭnia ŭ momant atrymańnia hrošaj u jaho słužbovym kabiniecie.
Hałoŭnyja fihuranty hetaj kryminalnaj historyi byli aryštavanyja prakuraturaj 6 žniŭnia.
Pravodzicca rasśledavańnie, daloka nie pieršaje ŭ haradskich kryminalnych spravach «žyllovaj palityki».Nahadajem, pad śledstvam znachodzicca ciapier užo były načalnik upraŭleńnia žyllovaj palityki Minharvykankama Mikałaj Kom. 25 maja Hałoŭnym śledčym upraŭleńniem papiaredniaha rasśledavańnia MUS jamu było pradjaŭlenaje abvinavačańnie ŭ nieadnarazovym atrymańni chabaru i pieravyšeńni słužbovych paŭnamoctvaŭ.