Milinkievič uznačalić kamitet «Za svabodu Daškieviča»
Tym časam prakuratura spyniła spravy suprać inšych lideraŭ MF.
Na minułym tydni Siaržuk Lisičonak atrymaŭ z prakuratury paviedamleńnie ab spynieńni suprać jaho kryminalnaj spravy. Akuratna taki samy list atrymaŭ taksama Aleh Korban. Suprać ich, a taksama Źmitra Daškieviča kryminalnaja sprava była zaviedziena jašče sioleta ŭ sakaviku. Z taho momantu pa ŭsioj Biełarusi prajšli dziasiatki dopytaŭ moładzievych aktyvistaŭ. Ciapier hetaja sprava padyšła da svajho finału: u sud pieradajuć spravu adnaho tolki Daškieviča.
Na minułym tydni Siaržuk Lisičonak atrymaŭ z prakuratury paviedamleńnie ab spynieńni suprać jaho kryminalnaj spravy pavodle art.193 č.1 ab udziele ŭ dziejnaści niezarehistravanaj arhanizacyi. Paviedamleńnie padpisanaje načalnikam adździełu respublikanskaj prakuratury M.Hardykam. Akuratna taki samy list atrymaŭ taksama Aleh Korban.
Suprać ich, a taksama Źmitra Daškieviča kryminalnaja sprava była zaviedziena jašče sioleta ŭ sakaviku. Jaje raspačaŭ kamitet pa baraćbie z teraryzmam KDB razam z prakuraturaj. Z taho momantu pa ŭsioj Biełarusi prajšli dziasiatki dopytaŭ moładzievych aktyvistaŭ. Ciapier hetaja sprava padyšła da svajho finału: u sud pieradajuć spravu adnaho tolki Daškieviča.
Źmitra Daškieviča buduć sudzić u Kastryčnickim sudzie Miensku, kudy pieradali ŭžo jahonuju spravu. Jak vynikaje sa Źmitrovych listoŭ na volu, jon užo pačaŭ znajomicca ź jaje materyjałami.
Nahadajem, što Źmitra Daškieviča aryštavali 15 vieraśnia, kali jon razam sa svaim advakatam pryjšoŭ na dopyt u prakuraturu, rastłumačyŭšy źmienu strymańnia tym, što Źmicier nie źjaŭlaŭsia na dopyty i nie žyvie na miescy prapiski ŭ Starych Darohach. Z taho času Daškievič znachodzicca ŭ SIZA pry vuł.Vaładarskaha. Jamu hroziać dva hady astrohu.
Čamu spynili spravy suprać inšych aktyvistaŭ? Lisičonak miarkuje, što abvinavaŭčy bok nia zdoleŭ sabrać patrebnaj dokaznaj bazy. «Suprać Daškieviča zrabić heta było lahčej, bo jon zaŭsiody byŭ publičnym čałaviekam, nie curaŭsia znosinaŭ z žurnalistami, byŭ adkrytym dla roznych kantaktaŭ». Jość i inšaje mierkavańnie: ułada baicca rabić ź junakoŭ hierojaŭ. Jana imkniecca zapałochvać, ale paźbiahaje čapać. A aryšt Daškieviča byŭ spravaj zachavańnia tvaru: nibyta ŭsio vyhladała, byccam sprava była, a ŭ vyniku – pšyk.
Tym časam padpolny «Małady front» miarkuje raspačać kampaniju ŭ abaronu Daškieviča z patrabavańniem vyzvalić jaho z-za krataŭ. Junaki majuć pravodzić vuličnyja akcyi, vyviešvać raściažki. Na minułym tydni ŭ «Małady front» ustupiła viadomaja aktyvistka Kryścina Šacikava. Jana rastłumačyła svoj krok jak znak salidarnaści z Daškievičam.
U čaćvier a 14:00 va ŭpravie BNF maje adbycca pasiedžańnie arhkamitetu «Za svabodu Daškieviča». Staršyniom arhkamitetu stanie Alaksandar Milinkievič. Usiu ž kaardynatarskuju dziejnaść budzie vykonvać Siaržuk Lisičonak. Zaraz viaducca pieramovy z cełym šeraham viadomych u Biełarusi ludziej u pytańni ŭdziełu ŭ arhkamitecie.
Fota Julii Daraškievič