Iran atrymaŭ rakiety C-300 ź Biełarusi

Pra heta paviedamiła ahienctva Associated Press sa spasyłkaj na iranskaje dziaržaŭnaje infarmahienctva Fars.

Iran atrymaŭ 4 zenitna-rakietnych kompleksy (ZRK) S-300, niahledziačy na admovu Rasiei pastavić ich u miežach dziejnaha kantrakta. Dźvie ŭstanoŭki atrymanyja ź Biełarusi, jašče dźvie — ź dźviuch inšych nienazvanych krainaŭ.

Pra heta paviedamiła ahienctva Associated Press sa spasyłkaj na iranskaje dziaržaŭnaje infarmahienctva Fars, źviazanaje z korpusam Vartavych isłamskaj revalucyi.

U paviedamleńni padkreślivajecca, što ŭpieršyniu pra najaŭnaść u Irana kompleksaŭ S-300 paviedamiŭ jašče letaś telekanał Al-Manar, jaki kantralujecca hrupoŭkaj «Chiezbałah». Fars zaŭvažaje, što iranskija ŭłady nie abvierhli tady hetuju infarmacyju.

Rasieja ŭ 2007 hodzie padpisała kantrakt na pastaŭku Iranu ZRK S-300, ale dahetul nia vykanała jaho. Hetyja sučasnyja i efektyŭnyja srodki istotna padvysili b abaronazdolnaść Iranu. Suprać rasiejska-iranskaj ździełki rašuča vystupali ZŠA i Izrail.

S-300 zdolnyja źbivać samaloty, kryłatyja rakiety i bajehałoŭki balistyčnych rakiet na adlehłaści zvyš 140 kilametraŭ i na vyšyni bolš za 27 kilametraŭ.

Maskva ŭ červieni zajaviła, što ŭ miežach novych sankcyjaŭ AAN jana admaŭlajecca ad pastavak Iranu kompleksaŭ S-300. Dziarždepartament ZŠA zajaviŭ, što Vašynhton vysoka cenić strymanaść u Rasiei.

Ale ŭ lipieni Siarhiej Čiemiezaŭ, kiraŭnik dziaržaŭnaha pramysłovaha hihant «Ruskije tiechnałohii» skazaŭ, što kantrakt na pastaŭku ZRK S-300 u Iran pakul, da rašeńnia prezydenta Miadźviedzieva, nie anulavany.

Kamentujučy siońniašniaje paviedamleńnie iranskaha ahienctva Fars Viačasłaŭ Davidzienka, presavy sakratar rasiejskaha kancernu pa handlim zbrojaj «Rosoboroneksport», skazaŭ, što kampanija nie pastaviła ŭ Iran nivodnaj

S-300. «My vykonvajem sankcyi AAN» — skazaŭ jon. Słužbovyja asoby ŭ Biełarusi admaŭlajucca kamentavać paviedamleńnie pra prodaž Mienskam S-300 Tehieranu.

Kamientary da artykuła