Prabityja lohkija, razarvanaja piečań i seks z małaletniaj: što adbyvajecca ŭnutry biełaruskaj milicyi i jak načalstva heta chavaje
Inicyjatyva «Bajpoł» apublikavała pierachoplenyja razmovy milicejskaha načalstva. Na zapisach siłaviki abmiarkoŭvajuć, jak schavać nastupstvy źbićcia zatrymanych i vyvieści z-pad udaru kaleh, jakija trapilisia na piedafilii abo atrymali nož u hrudzi ad kachanki.
Alaksandr Azaraŭ. Skrynšot ź videa
«Miortvaja zona» ŭ Salihorsku i zmova z sudmiedekśpiertam
Žycharka Salihorska paskardziłasia ŭ milicyju, što znajomy zabraŭ jaje navušniki. Padazravanaha, 41‑hadovaha miascovaha žychara Rahaleviča, pryvieźli ŭ RUUS. U dziažurcy jon pačaŭ spračacca, za što jamu załamali ruki, udaryli ŭ halonku i načapili kajdanki. Praź niekalki hadzin mužčynu zabrali ŭ reanimacyju sa złamanym siomym rabrom, prabitym lohkim i pierałomam nosa. Daktaram jon skazaŭ, što jaho źbili ŭ milicyi.
Na źlitych aŭdyjazapisach vyśviatlajecca, što zatrymanaha bili ŭ kalidorčyku pamiž dziažurnaj častkaj i IČU, kudy nie dastajuć kamiery. Kab vyratavać padnačalenych ad kryminalnaj spravy, načalstva vyrašyła zmadelavać situacyju z łajalnym ekśpiertam.
«Idziom pa šlachu, što heta było zakonnaje prymianieńnie fizičnaj siły. Zaŭtra budzie tałkovy sudmiedekśpiert, jaki skaža, ci možna takija paškodžańni atrymać, i ź jaho ŭdziełam hetuju situacyju budziem madelavać. A toje, što jon zamiest kalcyju pahłynaje harełku i ŭ jaho słabieńkija kości — nu, heta ŭžo takoje», — instruktuje kaleh adzin ź milicejskich čynoŭnikaŭ.
Razryŭ piečani pad Pietrykavam: «My ŭ piečań nie bili»
U vioscy Čaluščavičy Pietrykaŭskaha rajona maci vyklikała milicyju na syna pa proźviščy Radzinovič, jaki pabiŭ u chacie šyby. Zabirać jaho pryjechali načalnik kryminalnaha vyšuku Mickievič i opierupaŭnavažany Sierapin. Mužčynu pasadzili ŭ mašynu biez kajdankoŭ, ale pa darozie jon nibyta pasprabavaŭ vyskačyć na chadu. Milicyjanty ŭžyli siłu.
U 18:30 zatrymanaha začynili ŭ IČU. Ale dalej zdaryłasia niešta takoje, što a pałovie na čaćviortuju nočy Radzinoviča daviałosia praapieravać u balnicy z razryvam doli piečani. Paciarpieły zajaviŭ pra źbićcio, ale ŭ rapartach milicyjantaŭ napisana, što siłu ŭžyvali pavodle instrukcyi i «ŭ piečań nichto nie biŭ».
Pry hetym, jak zaŭvažajuć u «Bajpole», pakul siłavikam darujuć ciažkija traŭmy zatrymanych, maci dvaich dziaciej z susiedniaha Mazyra niadaŭna dali dva hady kałonii za zvyčajnuju «abrazu» supracoŭnika ABEZ.
Nož u hrudzi ad «pačvary sudzimaj» u Maładziečnie
Jašče adna historyja sa źlitych razmovaŭ tyčycca majora Illi Hrynceviča — namieśnika načalnika IČU Maładziečanskaha RAUS pa apieratyŭnaj pracy. Niahledziačy na toje, što aficer žanaty i maje siamju, jon zavioŭ raman z žančynaj, jakuju raniej sam kuryravaŭ i achoŭvaŭ u kamierach izalatara.
Adnojčy ranicaj pierad słužbaj, pamiž siomaj i vośmaj hadzinami, milicyjant zajšoŭ da kachanki dadomu. U kvatery pamiž imi ŭspychnuła svarka na hlebie reŭnaści, i byłaja źniavolenaja ŭdaryła majora nažom prosta ŭ hrudzi, prabiŭšy lohkaje.
Pakul Hryncevič lažaŭ u špitali, milicejskaje načalstva łamała hałavu, jak schavać skandał. Situacyju ŭskładniała toje, što kachanka aficera — raniej sudzimaja (na zapisach kalehi nazyvajuć jaje «pačvara sudzimaja»), a siłavikam kateharyčna zabaroniena mieć lubyja niefarmalnyja suviazi z takimi ludźmi. Kab vyharadzić majora, kiraŭnictva navat razhladała viersiju pra «pravakacyju».
Piedafilija ŭ Homieli: «Kanvair niejki dzieŭku čpoknuŭ»
Jašče adzin zapis tyčycca Homiela, dzie 26‑hadovy kanvair vioŭ intymnuju pierapisku z 15‑hadovaj školnicaj. Kali heta vypłyła, kiraŭnictva zamiest zatrymańnia prymusiła jaho zvolnicca pa ŭłasnym žadańni. Praź miesiac paćvierdziłasia, što milicyjanier spaŭ ź dziaŭčom, ale kryminalnuju spravu zaviali ŭžo na «cyvilnaha» — viedamasnaja statystyka nie paciarpieła.
Načalniki na zapisach abmiarkoŭvajuć heta cynična: «Tam u Homieli kanvair niejki dzieŭku čpoknuŭ…».
Chto idzie pracavać u MUS
Kiraŭnik «Bajpoła» Alaksandr Azaraŭ tłumačyć hetyja historyi kadravym hoładam paśla palityčnych čystak 2020 hoda. Ciapier u milicyju masava biaruć vypusknikoŭ škoł ź siarednim bałam da 5. Bolšaść navabrancaŭ idzie ŭ pastarunki, kałonii, IČU i navat učastkovymi biez bazavaj padrychtoŭki (tak zvanaj «pieršapačatkoŭki»), a bolš-mienš zdatnyja śpiecyjalisty zvalniajucca paśla pieršaha piacihadovaha kantraktu.
Danyja pra złačynstvy siarod svaich u MUS zasakrecili jašče ŭ 2018 hodzie — zvodki pa asabovym składzie pierastali pakazvać navat samim milicyjanieram. Vychavaŭčaja praca źviałasia da savieckich rytuałaŭ: supracoŭnikaŭ prymušajuć ad ruki pierapisvać u sšytki słužbovyja instrukcyi i ŭklejvać tudy vyrazanyja nažnicami natatki ź milicejskaj haziety «Na stražie».