Apublikavali śpis tavaraŭ, jakija nielha budzie ŭvozić z Łatvii

19 kastryčnika stała viadoma, što z 15 śniežnia 2026 hoda Biełaruś pašyryć zabaronu na ŭvoz i prodaž tavaraŭ z Łatvii. Ciapier apublikavanaja pastanova ŭrada ź pieralikam kankretnych pazicyj. U śpis uvajšli rybnyja kansiervy, knihi, mebla, aŭtazapčastki, rybałoŭnyja pryłady i šerah pramysłovych tavaraŭ.

Zdymak ilustracyjny. Fota: brivaisvilnis.lv

Siarod zabaronienaj pradukcyi — hatovyja vyraby i kansiervy z łasosia, sardanieły, kilki i traski, a taksama vitaminnyja i minieralnyja sumiesi dla dapaŭnieńnia charčavańnia. Abmiežavańni zakranuć drukavanyja knihi, haziety, repradukcyi i inšuju palihrafičnuju pradukcyju.

U śpis taksama ŭklučyli dekaratyŭnyja vyraby z płastyku, draŭlanyja ramy dla karcin, fatahrafij i lusterkaŭ, hihraskapičnuju bavaŭnianuju vatu, asobnyja vaŭnianyja koŭdry i pledy, meblu i jaje častki.

Zabarona raspaŭsiudžvajecca na aŭtazapčastki i prynaležnaści dla transpartnych srodkaŭ, vudy, rybałoŭnyja pryłady i niekatoryja palaŭničyja prynaležnaści.

Abmiežavańni achopiać i pramysłovyja tavary: padšypniki, detali sielskahaspadarčych mašyn, pałotny dla cyrkularnych piłaŭ, abstalavańnie suviazi, u tym liku maršrutyzatary i anteny, a taksama asobnyja transfarmatary, vyklučalniki, rele i razietki.

Pastanova ŭstupić u siłu 15 śniežnia 2026 hoda. Zabarona tyčycca tavaraŭ łatvijskaha pachodžańnia i pradukcyi, vyrablenaj na terytoryi Łatvii. Pry hetym jana nie raspaŭsiudžvajecca na tavary, uviezienyja ŭ Biełaruś da 14 śniežnia 2026 hoda.

Raniej biełaruski ŭrad patłumačyŭ rašeńnie abmiežavać impart łatvijskaj pradukcyi tym, što Łatvija, pavodle acenki Minska, prytrymlivajecca «niekanstruktyŭnych padychodaŭ» i vykarystoŭvaje «niedružalubnuju rytoryku» ŭ dačynieńni da Biełarusi.

Kamientary da artykuła