Francuzski hihant mabilnych hulniaŭ Voodoo abvinavaciŭ biełaruskuju SayGames u kapijavańni mabilnaj hulni — i znoŭ prajhraŭ
Apielacyjny sud Paryža adchiliŭ patrabavańni na bolš jak 3 miljony jeŭra. Pry hetym sud kanstatavaŭ, što sama Voodoo skapijavała piać rekłamnych rolikaŭ SayGames.
Jahor Vajchanski
7 kastryčnika 2026 hoda Apielacyjny sud Paryža całkam paćvierdziŭ rašeńnie suda pieršaj instancyi ŭ sprečcy pamiž francuzskaj kampanijaj Voodoo i hrupaj SayGames, jakuju zasnavaŭ biełarus Jahor Vajchanski.
4 listapada 2020 hoda Voodoo vypuściła ŭ App Store stratehiju City Takeover, u jakoj hulec zachoplivaje budynki supiernika. U krasaviku 2021 hoda francuzy zarehistravali ŭ ES šerah dyzajnaŭ, što achoŭvajuć hulniu.
Skryny hulni City Takeover
Skryny hulni Tower War — Tactical Conquest
U žniŭni 2021 hoda vyjšła hulnia Tower War — Tactical Conquest. Jaje raspracavała studyja Vaveda, a vyklučnaja licenzija na jaje naležyć kiprskaj SayGames LTD. Voodoo paličyła jaje kopijaj City Takeover. Francuzy zapatrabavali źniać hulniu z prodažu pa ŭsim śviecie, a taksama padali ŭ sud — na kiprskuju SayGames LTD i na biełaruskuju kampaniju hrupy, zarehistravanuju ŭ Minsku.
Voodoo prasiła:
- spahnać 3,16 miljona jeŭra kampiensacyi za parušeńnie pravoŭ na dyzajn i 100 tysiač jeŭra za maralnuju škodu;
- jak alternatyva, 952 tysiač i 300 tysiač jeŭra za niadobrasumlennuju kankurencyju;
- zabaranić Tower War u ES pad štrafam 10 tysiač jeŭra za kožny dzień;
- abaviazać SayGames vypuścić abnaŭleńnie hulni, jakoje zabłakuje mahčymaść u jaje hulać, i pakazać u im hulcam tekst sudovaha rašeńnia.
Sud pahadziŭsia, što ŭ abiedźviuch hulniach jość abjomnyja budynki ź ličbami na dachu, kalarovyja linii pamiž imi i maleńkija čałaviečki, jakija pa hetych linijach chodziać. Ale, na dumku sudździaŭ, heta ahulnyja rysy ŭsiaho žanru «złučy i zachapi».
Daśviedčany hulec, napisaŭ sud, źviartaje ŭvahu navat na drobnyja adroźnieńni. A jany jość: u Voodoo pole žoŭtaje, u SayGames zialonaje. Zamiest šerych ścienaŭ stajać šerahi drevaŭ. Piersanažy Voodoo majuć hałovy plušavych miedźviedzianiat, a ŭ SayGames heta sałdaty ŭ sinich kaskach.
Sud taksama adznačyŭ, što kolkaść spampovak City Takeover rezka ŭpała jašče da vychadu Tower War.
SayGames, u svaju čarhu, abvinavaciła Voodoo ŭ tym, što taja skapijavała piać jaje rekłamnych rolikaŭ, i zapatrabavała 340 tysiač jeŭra.
Sud kanstatavaŭ, što Voodoo sapraŭdy ŭziała roliki «identyčna» i hetaha nie asprečvała. Francuzskaja kampanija patłumačyła zdareńnie pamyłkaj rekłamnaj placoŭki, jakuju chutka vypravili. Sud hetaje tłumačeńnie pryniaŭ, nie ŭbačyŭ naŭmysnaści i sustrečny isk taksama adchiliŭ.
Voodoo pavinna zapłacić SayGames LTD 30 tysiač jeŭra sudovych vydatkaŭ za apielacyju, u dadatak da 15 tysiač jeŭra, prysudžanych u červieni 2024 hoda.
Što takoje SayGames
SayGames zasnavali ŭ Minsku ŭ 2017 hodzie Jahor Vajchanski i Andrej Sokał. Vajchanski skončyŭ BDU, niekalki hadoŭ pracavaŭ dyzajnieram u zamiežnych kampanijach, a ŭ 2011 hodzie stvaryŭ škołu anhlijskaj movy dla ajcišnikaŭ IT English. Ciapier jon hienieralny dyrektar SayGames, a apieracyjnym dyrektaram pracuje Dzianis Vajchanski.
Kampanija nie raspracoŭvaje hulni sama. Jana znachodzić niezaležnyja studyi, finansuje ich i vydaje ich prajekty. Siarod chitoŭ SayGames — My Perfect Hotel, DOP (Draw One Part), My Little Universe i taja samaja Tower War.
Pavodle kampanii, jaje hulni ściahnuli bolš jak 8 miljardaŭ razoŭ, a aktyŭnych karystalnikaŭ bolš za 140 miljonaŭ. SayGames stabilna ŭvachodzić u piaciorku najbujniejšych mabilnych vydaŭcoŭ śvietu pavodle kolkaści zahruzak. Tolki za lipień 2022 hoda jana zarabiła ŭ App Store i Google Play kala $3 miljonaŭ.
Kiprskaja SayGames LTD paŭstała ŭ 2020 hodzie. Ciapier na Kipry znachodzicca hałoŭny ofis, a asnoŭnaja kamanda pracuje ŭ Polščy. Polskaja kampanija hrupy ŭ 2023 hodzie mieła kala $6,4 miljonaŭ vyručki. Usiaho ŭ SayGames kala 250 supracoŭnikaŭ, pra Biełaruś na jaje sajcie bolš nie zhadvajecca.
Pavodle francuzskaha suda, biełaruskaja kampanija hrupy, zasnavanaja ŭ 2018 hodzie, spyniła dziejnaść 9 listapada 2022 hoda paśla likvidacyi. Jašče adna minskaja struktura, rezident PVT «Kažyhulni», u studzieni 2023 hoda trapiła ŭ śpis kampanij z akcyjanierami z «niepryjaznych krain». U červieni 2024 hoda ŭłaśnik pačaŭ jaje likvidacyju.