Zialenski pahadziŭsia b nie nanosić udary pa rasijskich enierhaabjektach u abmien na pašyreńnie zony pakryćcia Starlink uhłyb Rasii
Zonu pakryćcia Starlink prapanujecca pavialičyć prykładna na 300 kiłamietraŭ.
AP Photo/Stefan Jeremiah
Amierykanskija sienatary padčas vizitu ŭ Kijeŭ prapanavali prezidentu Ukrainy Uładzimiru Zialenskamu «zrabić paŭzu» va ŭdarach pa rasijskich enierhaabjektach u abmien na pašyreńnie zony pakryćcia spadarožnikavaj sistemy Starlink. Pra heta piša The Wall Street Journal sa spasyłkaj na krynicy.
Zonu pakryćcia Starlink prapanujecca pavialičyć prykładna na 300 kiłamietraŭ uhłyb terytoryi Rasii. Paviedamlajecca, što z takoj prapanovaj vystupili sienatary Rodžer Uikier ad štata Misisipi i Kievin Krejmier ad Paŭnočnaj Dakoty.
WSJ piša, što Zialenski zajaviŭ pra hatoŭnaść pryniać hetuju prapanovu i spynić udary pa enierhietyčnych abjektach na sto dzion.
Raniej u intervju Financial Times Zialenski kazaŭ, što prapanoŭvaŭ Trampu pašyryć pakryćcio Starlink na terytoryju Rasii, kab Ukraina mahła źniščać rasijskija puskavyja ŭstanoŭki balistyčnych rakiet.
«Kali vy nie budziecie zakryvać dla nas Starlink, kali vy adkryjecie Starlink na terytoryi Rasii, my źniščym jaho puskavyja ŭstanoŭki balistyčnych rakiet, i na hetym dla [Pucina] ŭsio skončycca. Jon siadzie i budzie razmaŭlać, a ja nie budu źniščać nijakija enierhietyčnyja abjekty. Mnie heta nie treba», — skazaŭ prezident Ukrainy.