Vynieśli prysud zahadčycy mahiloŭskich atrakcyjonaŭ, dzie zahinuŭ 18‑hadovy stažor

U Mahilovie zahadčycu parku atrakcyjonaŭ asudzili na 2,5 hoda vypraŭlenčaj kałonii-pasialeńnia praz hibiel 18‑hadovaha stažora.

Trahiedyja adbyłasia 1 maja. Paśla zaviaršeńnia cykła atrakcyjona «Salta», kali naviedniki ŭžo pajšli, bałansir z karusiellu pačaŭ ruchacca, bo jaho nie zafiksavali. Ruchomaja častka kanstrukcyi ŭdaryła maładoha čałavieka pa hałavie. Ad atrymanaj čerapna-mazhavoj traŭmy jon pamior na miescy.

Śledčy kamitet paviedamiŭ, što da adkaznaści pryciahnuli 25‑hadovuju zahadčycu parku. Jana adkazvała za vykanańnie praviłaŭ techniki biaśpieki i achovy pracy, a taksama za biaśpiečnuju ekspłuatacyju atrakcyjonaŭ.

Sud vyśvietliŭ, što žančyna dapuściła 18‑hadovaha stažora da pracy na atrakcyjonie, choć ź im nie byli aformlenyja pracoŭnyja adnosiny. Małady čałaviek nie prachodziŭ abaviazkovaha miedycynskaha ahladu, navučańnia, stažyroŭki, pieršasnaha instruktažu i pravierki viedaŭ u halinie pramysłovaj biaśpieki i achovy pracy.

Sud pryznaŭ zahadčycu vinavataj u parušeńni pravił achovy pracy słužbovaj asobaj, jakoje pa nieaściarožnaści pryviało da śmierci čałavieka. Pry vyniasieńni prysudu ŭličyli jaje ščyraje raskajańnie.

Žančynu asudzili na dva z pałovaj hady vypraŭlenčaj kałonii-pasialeńnia. Akramia taho, na praciahu piaci hadoŭ joj zabaroniena zajmać pasady, źviazanyja z vykanańniem arhanizacyjna-rasparadčych abaviazkaŭ.

Park atrakcyjonaŭ vystupaŭ u spravie hramadzianskim adkazčykam. Sud pastanaviŭ spahnać z arhanizacyi na karyść maci zahinułaha, pryznanaj paciarpiełaj, 150 tysiač rubloŭ u jakaści kampiensacyi maralnaj škody.

Kamientary da artykuła