Źmianili śpis prafiesij, na jakija lohka možna najmać inšaziemcaŭ

Z 1 studzienia 2027 hoda ŭ Biełarusi źmienicca pieralik prafiesij, na jakija možna najmać inšaziemcaŭ i asob biez hramadzianstva, što nie majuć dazvołu na pastajannaje žycharstva ŭ krainie, pavodle sproščanaj pracedury. Adpaviednuju pastanovu Ministerstva pracy i sacyjalnaj abarony apublikavali na Nacyjanalnym pravavym internet-partale.

Zdymak ilustracyjny. Fota: «Zaria»

U 2025 hodzie ŭ pieraliku było 41 rabočaja prafiesija i 18 pasad słužboŭcaŭ. Na 2026 hod jaho skaracili da 29 rabočych prafiesij i 18 pasad słužboŭcaŭ. U 2027 hodzie śpis znoŭ źmienicca: u im budzie 31 rabočaja prafiesija i 16 pasad słužboŭcaŭ.

Siarod źmien u pieraliku rabočych prafiesij — zamiest kiroŭcy ŭklučyli kiroŭcu aŭtamabila i kiroŭcu pahruzčyka. Sa śpisu vyklučyli manciora puci, ale dadali apieratara ptuškafabryk i miechanizavanych fiermaŭ, a taksama traktarysta.

U pieraliku pasad słužboŭcaŭ bolš nie budzie akušeraŭ i fielčaraŭ.

Pry najmańni inšaziemcaŭ na prafiesii i pasady, uklučanyja ŭ pieralik, pracadaŭcu dastatkova paviedamić pra heta orhanam unutranych spraŭ. U astatnich vypadkach nieabchodna atrymać śpiecyjalny dazvoł i dakazać, što vakansiju niemahčyma zapoŭnić hramadzianami Biełarusi abo inšaziemcami, jakija majuć pastajanny dazvoł na žycharstva.

U lipieni Ministerstva ŭnutranych spraŭ prapanoŭvała ŭklučyć u pieralik deficytnych śpiecyjalnaściaŭ daktaroŭ-internaŭ, pravizaraŭ i pradstaŭnikoŭ niekatorych inšych prafiesij. Adnak pakul hetyja śpiecyjalnaści ŭ śpis nie ŭvajšli.

Kamientary da artykuła