Rasija ŭdaryła dronami pa tureckim sudnie z kukuruzaj
Prezident Ukrainy Uładzimir Zialenski zajaviŭ, što rasijskija drony nanieśli ŭdar pa cyvilnym sudnie, jakoje pieravoziła kukuruzu. Pavodle jaho słoŭ, sudna naležała Turcyi i znachodziłasia ŭ niejtralnych vodach Čornaha mora, a na borcie byli hramadzianie Azierbajdžana i Indyi, piša «Jeŭrapiejskaja praŭda».
Zdymak ilustracyjny
Zialenski paviedamiŭ, što pa sudnie ŭdaryli dva rasijskija bieśpiłotniki. Pavodle papiaredniaj infarmacyi, zahinuŭ kapitan, a los jašče adnaho čałavieka vyśviatlajecca. Adzinaccać členaŭ ekipaža ŭdałosia vyratavać, adzin ź ich atrymaŭ ranieńni.
Ukrainski prezident zajaviŭ, što Ukraina ŭžo nieadnarazova prapanoŭvała kankretnyja miery dla deeskałacyi i harantavańnia biaśpieki sudnachodstva ŭ Čornym mory. Adpaviednyja prapanovy, pavodle jaho słoŭ, pastupali i ad inšych krain. Jon abvinavaciŭ Rasiju ŭ tym, što jana zamiest narmalnaha sudnachodstva praciahvaje atakavać cyvilnyja sudny, i zaklikaŭ da mižnarodnaha cisku dziela adnaŭleńnia hłabalnaj charčovaj biaśpieki.
Pry hetym raniej rumynskija ŭłady paviedamlali pra dvuch zahinułych u vyniku hetaj ataki, tamu infarmacyja pra kolkaść achviar na momant publikacyi zastavałasia roznaj.
Na fonie ataki praciahvajucca mižnarodnyja namahańni pa adnaŭleńni biaśpiečnaha handlovaha maršrutu ŭ Čornym mory. Vysokaja pradstaŭnica ES pa zamiežnych spravach Kaja Kałas zaklikała spryjać adnaŭleńniu hetaha maršrutu. Prezident Turcyi Redžep Taip Erdahan zajaviŭ, što Ankara ŭzmacniaje dypłamatyčnyja namahańni dziela adnaŭleńnia ekspartu zbožža praz Čornaje mora i atrymała ad Ukrainy stanoŭčy sihnał.
Taksama raniej paviedamlałasia, što Turcyja i AAN płanujuć novyja pieramovy pamiž Rasijaj i Ukrainaj nakont pieramirja ŭ Čornym mory. Meta hetych namahańniaŭ — abjadnać roznyja inicyjatyvy dla abarony pastavak zbožža na fonie značnaha rostu suśvietnych cen na charčavańnie.