Jak na ŭskrainie Minska budujecca kvartał panelnych taŭnchausaŭ FOTY
Adzin z varyjantaŭ dla minčukoŭ-čarhavikoŭ — žyllo ŭ panelnych taŭnchausach prosta kala kalcavoj. Havorka idzie pra žyły kompleks «Paŭnočny» (nie błytać z «Paŭnočnym bieraham»), jaki aktyŭna budujecca ŭ rajonie Daŭhinaŭskaha traktu. Realt pahladzieŭ, jak prasoŭvajecca budaŭnictva i kolki ciapier kaštuje kvadratny mietr u hetych damach.
Panelnyja taŭnchausy niedaloka ad Daŭhinaŭskaha trakta ŭzvodzić dziaržaŭny zabudoŭščyk — pradpryjemstva MAPID. Žyły masiŭ na paŭnočnaj uskrainie stalicy zojmie ŭčastak ad kalcavoj da vulicy Mikuliča. Usiaho tut pabudujuć bolš za 20 tysiač kvadratnych mietraŭ žylla.
Da kompleksu žurnalisty dabiralisia na hramadskim transparcie. Daroha ciapier znachodzicca na maštabnym ramoncie, tamu pajezdka nie abychodzicca biez zatoraŭ. Najbližejšy da taŭnchausaŭ prypynak znachodzicca za 600—700 mietraŭ, kali jechać z horada. U napramku horada — krychu bližej.
Ad Arłoŭskaj da taŭnchausaŭ možna dajechać maršrutkaj. Taksama tut chodziać haradskija i pryharadnyja aŭtobusy. Aryjencir — hipiermarkiet ALL. Jaho treba abyści i paviarnuć naprava.
Novy katedžny pasiołak, amal jak domiki z amierykanskaj mary, raźmiaściŭsia na fonie kukuruznych paloŭ. Tut užo źjaviłasia niekalki novych vulic. Uzdoŭž daroh ustalavanyja lichtary, zroblenyja tratuary i vysadžanyja maładyja drevy.
Častka taŭnchausaŭ užo zasielenaja. Zabudoŭščyku zastałosia ŭźvieści jašče dźvie čarhi — šostuju i siomuju. U pieradapošniaj čarzie zapłanavana budaŭnictva jašče piaci žyłych damoŭ. Heta buduć taŭnchausy na 4, 11 i 12 kvater. Usio žyllo budzie dvuchpaviarchovym, biez padziemnaha paviercha i z płoskim dacham. Hetyja damy płanujuć zdać u 2027 hodzie.
Usie błakiravanyja damy ŭ kvartale padobnyja. Płošča typavych kvater u taŭnchausach składaje kala 105—120 kvadratnych mietraŭ. Na pieršym paviersie zvyčajna raźmiaščajucca choł, sanvuzieł, mini-kacielnia, kuchnia, haścioŭnia i terasa, na druhim — dźvie-try spalni, harderobnaja i vanny pakoj. U damach praduhledžanaja vadzianaja pakvaternaja sistema aciapleńnia. Ciepłazabieśpiačeńnie ažyćciaŭlajecca ad hazavaha katła z zakrytaj kamieraj zharańnia.
Ciapier u prodažy jość amal hatovyja taŭnchausy. Naprykład, niekalki kvater u piataj čarzie damoŭ pakul zastajucca biez haspadaroŭ. Košt kvadratnaha mietra ŭ ich pačynajecca ad 4625 rubloŭ — 1540 dalaraŭ pavodle kursu Nacbanka.
Takim čynam, samy dastupny taŭnchaus u ŽK «Paŭnočny» abydziecca prykładna ŭ 500 tysiač rubloŭ, abo kala 166 tysiač dalaraŭ. Pretendavać na takoje žyllo mohuć čarhaviki biez nakiravańniaŭ.
U novym pasiołku ŭžo źjavilisia ahulnyja dziciačyja i spartyŭnyja placoŭki.
Krychu vyšej, na ŭzhorku, znachodzicca jašče adna linija damoŭ — krajavidy adsiul buduć vidavočna lepšyja.
Što da infrastruktury, to pobač z «Paŭnočnym» pakul jość tolki kramy, u tym liku toj samy ALL. Najbližejšyja dziciačyja sady znachodziacca ŭ Navinkach i «Paŭnočnym bierazie», a da škoł daviadziecca jeździć.
Vizualna kvartał pakidaje dobraje ŭražańnie. Na fonie chaatyčnaj zabudovy Cnianki hetaje miesca vyhladaje amal rajem: idealnaja hieamietryja linij, ułasnyja ŭčastki i cikavaja koleravaja hama. Praŭda, jość niekalki niuansaŭ, jakija mohuć sapsavać ahulnuju karcinu: blizkaść ažyŭlenaj MKAD i linija elektrapieradačy, jakaja prachodzić pobač. Zrešty, kvater, vokny jakich vychodziać na pali i les udalečyni, heta nie datyčycca.