Minčanka zaviała miłaha pieŭnia zamiest sabaki, hulaje ź im pa horadzie i zachodzić u kafe
Dekaratyŭny pieŭnik Šałapieńje śpić razam z haspadyniaj i supravadžaje jaje pa darozie ŭ apteku ci na poštu. Minčanka Alena Ščatko raskazała «Smartpres», jak u jaje źjaviŭsia hety niezvyčajny hadavaniec.
Fota: «Smartpres»
Alenie 54 hady, jana pracuje ŭ vieterynarnaj klinicy i žyvie z mužam u pryvatnym domie. Raniej jana trymała papuhajaŭ i kanarejek. Hod tamu razam ź siabroŭkaj nabyła jajki dekaratyŭnych kurej parody małajzijskaja sierama i inkubatar. Tak i źjaviŭsia Šałapieńje.
Ciapier pieŭniku amal hod. Jon nievialiki: kala 25 sm rostam i 500 h vahoj. Pa domie chodzić svabodna i ŭsiudy supravadžaje haspadyniu, jeść za stałom sa svajoj talerački. Śpić pieŭnik z haspadyniaj u łožku na ručniku i nie budzić jaje na dośvitku: jon padładziŭsia pad jaje režym i kukarekaje tolki paśla taho, jak jana ŭstanie.
Alena časta biare Šałapieńje ŭ horad: jany špacyrujuć pa vulicach, zachodziać u kaviarniu, a kali treba, to i na poštu, u apteku.
«Kali ŭ mianie vychadny, ja ŭsiudy ź im. Kažu: «Pojdziem hulać!», i jon užo biažyć da mašyny. Adkryvaju dźviery — i Šałapieńje sam zaskokvaje na piaredniaje siadzieńnie, dzie lažyć jaho matrac. Na im jon pravodzić usiu pajezdku, litaralna nie varušycca (pa sałonie mašyny jon nie biehaje)».
Fota: «Smartpres»
Za hod im ni razu nie admovili va ŭvachodzie ŭ kaviarniu. Tam pieŭnik siadzić na ručniku na śpincy kresła. Sabak jon nie baicca, a voś ad varon, jakija na jaho palujuć, prosicca na ruki.
Bolšaść minakoŭ reahuje ź cikaŭnaściu: fatahrafujuć, prosiać pahładzić, asabliva dzieci, niekatoryja ź jakich nikoli nie bačyli žyvoha pieŭnia.