Stała viadoma imia druhoha piłota FlyDubai, jaki napaŭ na kapitana samalota, što lacieŭ u Tel-Aviŭ
Heta 29‑hadovy Chamam Al-Chamami. Jon źjaŭlajecca hramadzianinam Amana.
Druhi piłot samalota avijakampanii FlyDubai, jaki 30 vieraśnia, jak miarkujecca, napaŭ na kalehu i sprabavaŭ spravakavać avijakatastrofu, — 29‑hadovy Chamam Al-Chamami, paviedamlaje ABC News sa spasyłkaj na krynicy.
Jon źjaŭlajecca hramadzianinam Amana.Pavodle adnoj z krynic CNN, Al-Chamami naradziŭsia ŭ Abjadnanych Arabskich Emiratach u siamji baćki-amanca i maci-siryjki i niekalki hadoŭ pražyŭ tam.
U profili LinkedIn na imia Chamama Al-Chamami było paznačana, što jon siem hadoŭ pracavaŭ u avijakampanii Oman Air (zvolniŭsia ŭ lutym 2025 hoda), paśla čaho ŭ červieni 2025 hoda pierajšoŭ u Royal Air Maroc i pakinuŭ jaje ŭ studzieni 2026 hoda. Zhadak pra flydubai na staroncy nie było. Adna z krynic paćvierdziła, što hety profil naležyć piłotu FlyDubai, jaki ŭdzielničaŭ u incydencie. Na hety momant profil vydaleny, adznačaje telekanał.
U 2024 hodzie ŭ Al-Chamami, jaki prachodziŭ stažyroŭku ŭ jakaści druhoha piłota avijakampanii Oman Air, byli vyjaŭlenyja ekstremisckija materyjały.
Pavodle surazmoŭcaŭ telekanała, jamu dazvolili praciahnuć pracu ŭ avijakampanii na administracyjnaj pasadzie. Miarkujecca, što jaho adchilili ad palotaŭ z-za aściaroh nakont jahonych ekstremisckich pohladaŭ.
Ciapier vyśviatlajecca, jakim čynam mierkavanamu napadniku paźniej dazvolili lotać u jakaści piłota Flydubai i jon apynuŭsia ŭ kabinie samalota, jaki lacieŭ u Izrail, u jakaści druhoha piłota.
U čaćvier Al-Chamami pieravieźli z Saudaŭskaj Aravii ŭ AAE. Jon pryznaŭsia ŭ tym, što mieŭ namier raźbić samalot u Izraili.
Incydent na borcie rejsa Dubaj — Tel-Aviŭ adbyŭsia 30 vieraśnia Prykładna praź dźvie hadziny paśla pačatku palotu samalot rezka straciŭ bolš za 17 tysiač futaŭ, abo kala 5,2 kiłamietra, vyšyni.
Adna z pasažyrak, jakaja išła z maleńkaj dačkoj u tualet, pačuła šum u kabinie piłota i źviarnuła na heta ŭvahu inšych pasažyraŭ i členaŭ ekipaža. Nieŭzabavie stała zrazumieła, što ŭ kabinie adbyvajecca baraćba.
Pasažyry sprabavali trapić u kabinu, ale zrabić heta spačatku nie ŭdałosia. Paśla teraktaŭ 11 vieraśnia 2001 hoda pracedura dostupu ŭ kabinu była źmienienaja takim čynam, što dźviery možna było adkryć tolki znutry.
Kali samalot praciahvaŭ tracić vyšyniu, dźviery raptam adčynilisia. Niekalki izrailskich pasažyraŭ zmahli abiasškodzić druhoha piłota, jaki napaŭ na kapitana z nažom i, pavodle śviedčańniaŭ vidavočcaŭ, sprabavaŭ paškodzić panel kiravańnia samalotam.
Paśla hetaha pasažyry razam ź piłotam, jaki znachodziŭsia na borcie, zdoleli stabilizavać samalot i pasadzić jaho ŭ aeraporcie Tabuka na paŭnočnym zachadzie Saudaŭskaj Aravii. Paranienaha piłota Śmita Mačchara spačatku dastavili ŭ balnicu Tabuka, a zatym sanitarnym rejsam pieravieźli ŭ Abu-Dabi.