Mama zabitaj u Izraili biełaruski: Pryhažość joj nie pryniesła ščaścia

Maci spadziajecca pachavać dačku ŭ Biełarusi.

Jana

U aŭtorak hamialčancy Hańnie patelefanavali ź izrailskaha konsulstva i paviedamili strašnuju navinu: jaje dačka Jana, jakaja žyła ŭ Chajfie, pamierła. Za niekalki dzion da hetaha žančyna zapadozryła niadobraje, tamu što dačka raptam pierastała vychodzić na suviaź. Pavodle danych izrailskich ŚMI, u dačynieńni da hibieli maładoj biełaruski padazrajuć jaje muža. 

Zaraz mama zahinułaj Jany zajmajecca pytańniami repatryjacyi cieła dački ŭ Biełaruś.

— Nam dapamahajuć i ź izrailskaha, i ź biełaruskaha boku. Ja nie zastałasia biez padtrymki i ŭsim za heta ŭdziačnaja. Mahčyma, kali b ja ŭ svoj čas pierajechała da dački, ničoha hetaha nie adbyłosia b…

— Ale ŭ nas ciažka zachvareŭ baćka. I my ź Janaj tady vyrašyli: ja zastajusia ŭ Homieli, kab hladzieć jaho. Dačka časta prylatała, va ŭsim mnie dapamahała, — raskazała Onliner mama zahinułaj Hanna.

Pavodle jaje słoŭ, u ich z dačkoj byli vielmi ciopłyja adnosiny — Jana była dla mamy samaj blizkaj siabroŭkaj.

— U mianie abiedźvie dački vielmi pryhožyja (Jana była starejšaj), ale joj hetaja pryhažość ščaścia nie pryniesła. Usio adbyłosia z-za kachańnia. Reŭnaść — strašnaje pačućcio, asabliva kali jana stanovicca chvaravitaj. Z-za hetaha i adbyvajucca padobnyja trahiedyi, i mnie jak maci ciapier nievynosna baluča…

Hanna pryznajecca: kali naradziŭsia ŭnuk, jana vydatna razumieła, jak ciažka daviadziecca Janie hadavać dzicia adnoj u čužoj krainie biez padtrymki blizkich.

— Mnie ŭ svoj čas maja mama dapamahała hadavać Janu, i ja, viadoma ž, taksama vielmi chacieła joj dapamahčy. Ale, na žal, usio skłałasia inakš.

Unuka i dačku Hanna bačyła kožny dzień pa videasuviazi. Chłopčyka nazvali Łacif, što ŭ pierakładzie z arabskaj aznačaje «miły».

— Hanna, ci jość niejkaja peŭnaść z tym, ci dazvolać vam zabrać unuka ŭ Biełaruś?

— Pakul nie mahu adkazać na hetaje pytańnie. Rašeńnie buduć prymać izrailskija ŭłady. Słava Bohu, unuk žyvy, a dalej budzie vidać: ja jašče nie staraja, vyhadavać jaho zmahu. Ciapier hałoŭnaje — vyrašyć pytańnie ź Janaj, viarnuć jaje na radzimu. Ale tut, jak ja ŭžo kazała, mnie vielmi dapamahajuć. Dačku my pachavajem u Biełarusi.

Kamientary da artykuła