Kubrakoŭ zajaviŭ, što narkadylery pierakidvajuć narkotyki z Polščy ŭ Biełaruś z dapamohaj mieteazondaŭ
Potym, pa słovach ministra ŭnutranych spraŭ, narkotyki pastaŭlajucca ŭ Rasiju.
Kiraŭnik MUS Ivan Kubrakoŭ na pasiadžeńni Rady ministraŭ unutranych spraŭ krain SND raskazaŭ pra vykarystańnie mieteazondaŭ, a mienavita pra toje, što ź ich dapamohaj narkadylery pierakidvajuć narkotyki z Polščy ŭ Biełaruś dla tranzitu ŭ Rasiju, paviedamlaje pres-słužba MUS.
«Sioleta my sutyknulisia z novym sposabam niezakonnaha pieramiaščeńnia bujnych partyj praz zachodnija rubiažy našaj krainy — z vykarystańniem pavietranych mieteazondaŭ, abstalavanych sistemami hieałakacyi i mabilnaj suviazi. Vyjaŭleny nieadnarazovyja vypadki ich transparciroŭki z Polščy z metaj dalejšaha tranzitu ŭ Rasijskuju Fiederacyju», — raspavioŭ Kubrakoŭ.
Pavodle jaho słoŭ, u Hrodzienskaj vobłaści kanfiskavana bolš za 142 kh narkatyčnych rečyvaŭ, jakija trapili ŭ Biełaruś z dapamohaj mieteazondaŭ.