Samalot Flydubai uratavali piłot-indyjec i try pasažyry, adzin ź jakich stamatołah. Druhoha piłota źviazali pravadami ad słuchavak i małankami

Izrailski stamatołah Šata Musajeŭ dapamoh abiasškodzić druhoha piłota rejsa Flydubai, jakoha padazrajuć u sprobie nakiravać samalot da ziamli, a paśla akazaŭ miedycynskuju dapamohu ciažka paranienamu kamandziru ekipaža.

Šata Musajeŭ

Musajeŭ raskazaŭ u intervju izrailskamu vydańniu Ynet, što, pačuŭšy kryki, pabieh u piaredniuju častku samalota.

«Ja išoŭ zmahacca z terarystam, a nie akazvać miedycynskuju dapamohu», — pryznaŭsia jon.

Pavodle jaho słoŭ, pieršym na dapamohu kinuŭsia pasažyr pa imieni Janiŭ, a sam stamatołah dałučyŭsia, kali zrazumieŭ, što adbyvajecca niešta surjoznaje.

Druhoha piłota, jaki rodam z Amana, udałosia skrucić tolki ź vialikaj ciažkaściu. Jon luta supraciŭlaŭsia i sprabavaŭ vyrvacca. Pasažyry źviazali jamu ruki i nohi pravadami ad słuchavak i małankami ad kurtak.

Pasažyra Janiva Chajona, jaki adyhraŭ značnuju rolu ŭ praduchileńni avijakatastrofy, u tel-aviŭskim aeraporcie pryvitaŭ premjer-ministr Izraila Bińjamin Nietańjachu

U hety čas kamandzir lažaŭ na padłozie z mocnym kryvaciokam z ran na hałavie i rukach. Jon zastavaŭsia ŭ prytomnaści, razmaŭlaŭ z pasažyrami i paviedamiŭ, što jamu 39 hadoŭ i ŭ jaho dvoje dziaciej. Pa słovach Musajeva, napadnik nanosiŭ piłotu ŭdary i łajaŭsia na jaho.

«Ja byŭ adzinym doktaram u samalocie. Mnie ŭdałosia spynić kryvaciok», — raskazaŭ stamatołah.

Da pasadki stan kamandzira zastavaŭsia davoli stabilnym, choć pierad pryziamleńniem krychu pahoršyŭsia. Paśla pasadki jamu dapamahli saudaŭskija miedyki. Mienavita ad ich Musajeŭ daviedaŭsia, što piłot vyžyŭ i jaho žyćciu ŭžo ničoha nie pahražaje.

Najbolš strašnym momantam padčas palotu Šata Musajeŭ nazvaŭ rezkuju stratu vyšyni. Pavodle jaho słoŭ, prykładna za paŭchviliny samalot imkliva pajšoŭ uniz, i pasažyry byli ŭpeŭnienyja, što mohuć zahinuć.

30 vieraśnia padčas palotu nad Iardanijaj samalot na rejsie FZ1073 avijakampanii flydubai z Dubaja ŭ Tel-Aviŭ spačatku pieradaŭ ahulny avaryjny kod 7700, a zatym — kod 7500. Apošni aznačaje niezakonnaje ŭmiašańnie ŭ kiravańnie samalotam i zvyčajna vykarystoŭvajecca pry sprobie zachopu.

Bort rezka źniziŭsia, raźviarnuŭsia i nakiravaŭsia ŭ Saudaŭskuju Araviju. Na niekatory čas suviaź z ekipažam źnikła, ale paśla jon biaśpiečna pryziamliŭsia ŭ saudaŭskim aeraporcie. Na borcie Boeing 737 MAX 8 znachodzilisia 174 pasažyry, pieravažna izrailcianie.

Vyśvietliłasia, što adzin ź piłotaŭ sprabavaŭ nakiravać samalot u ziamlu, a druhi pieraškodziŭ hetamu. Hetym druhim byŭ indyjec Śmit Mačchar. Atrymaŭšy nažavoje ranieńnie i ŭžo spłyvajučy kryvioj, jon sabraŭ apošnija siły i zdoleŭ adčynić dźviery kabiny piłotaŭ.

Śmit Mačchar

Kamientary da artykuła