Masiravanaja ataka na Kijeŭščynu: zahinuła dzicia, razburanyja i paškodžanyja damy, abjekty infrastruktury
U noč na sieradu Kijeŭščyna zaznała čarhovuju rakietna-dronavuju ataku. Zahinuła dzicia, troje čałaviek atrymali traŭmy, razburanyja i paškodžanyja damy, zafiksavanyja nastupstvy na abjektach infrastruktury.
«U Vyšharadzie z-pad zavałaŭ razburanaha pryvatnaha doma ratavalniki vyratavali troch čałaviek. Siarod ich — dzicia, u jakoha ŭźnikła vostraja reakcyja na stres. Mužčyna atrymaŭ askiepkavyja ranieńni hałavy, žančyna — traŭmy nahi. Im akazvajecca nieabchodnaja miedycynskaja dapamoha», — paviedamiŭ kiraŭnik abłasnoj vajennaj administracyi Raman Tkačenka.
Na žal, pad zavałami vyjavili cieła jašče adnaho dziciaci.
U Vyšharadskim rajonie paškodžanyja i razburanyja pryvatnyja damy, uźnikli pažary ŭ žyłym domie i haražach. Taksama paškodžana škleńnie doma.
U Bučanskim rajonie paškodžanyja try pryvatnyja damy, 11 aŭtamabilaŭ, dva składskija pamiaškańni, uźnik pažar. Taksama zafiksavanyja nastupstvy ataki na abjektach infrastruktury ŭ Bučanskim, Vyšharadskim i Abuchaŭskim rajonach, piša «Ukrainskaja praŭda».
Taksama hetaj nočču Kijeŭ byŭ atakavany balistyčnymi rakietami. U horadzie ŭźnikli pažary, u pryvatnym siektary, u pryvatnaści, hareli damy. Dvoje čałaviek paciarpieli.