Biełarusa ŭ ZŠA pryznali vinavatym u parušeńni sankcyj suprać Rasii
Fiederalny sud prysiažnych u Bostanie pryznaŭ 37‑hadovaha biełaruskaha i amierykanskaha hramadzianina Kiryła Hardzieja vinavatym u niezakonnym vyvazie z ZŠA ŭ Rasiju mas-śpiektromietra Orbitrap Exploris GC 240 bieź nieabchodnaj licenzii, piša Reform.news.
Kirył Hardziej. Fota: apps.sheriff.org
Hardziej byŭ pryznany vinavatym pa troch abvinavačańniach: zmova suprać ZŠA, kantrabanda tavaraŭ i niezakonny ekspart tavaraŭ, jakija padlahajuć ekspartnamu kantrolu. Maksimalnaje pakarańnie za parušeńnie ekspartnaha kantrolu — da 20 hadoŭ źniavoleńnia, za kantrabandu — da 10 hadoŭ, za zmovu — da 5 hadoŭ, taksama mahčymyja bujnyja štrafy. Prysud pavinny vynieści 12 studzienia 2027 hoda.
Hardzieja zatrymali ŭ kancy červienia 2024 hoda. Jon kiravaŭ transpartna-ekśpiedytarskaj kampanijaj Apelsin Logistics u Fłarydzie, jakaja mieła adras i sajty ŭ Rasii.
Pavodle abvinavačańnia, u žniŭni 2023 hoda Hardziej aformiŭ adpraŭku śpiektromietra va Uźbiekistan, choć nasamreč abstalavańnie pryznačałasia dla Rasii. Košt prybora pieravyšaŭ 600 tysiač dalaraŭ. Paśla pačatku rasijskaha ŭvarvańnia va Ukrainu takoje abstalavańnie ŭnieśli ŭ śpis tavaraŭ, dla ekspartu jakich u Rasiju patrebnaja śpiecyjalnaja licenzija. Jaje ŭ Hardzieja nie było. Śpiektromietr spačatku vyvieźli z ZŠA ŭ Turcyju, a adtul arhanizavali jaho dastaŭku ŭ Maskvu.
Čytajcie taksama:
Va Ukrainie zaviali spravu za pieradaču Biełarusi prahramy dla vajskovych avijacyjnych trenažoraŭ
Va Ukrainie na zapyt ZŠA aryštavali hramadzianina Biełarusi, jakoha padazrajuć u kibierzłačynstvach