Zasnavany biełarusami startap kupiŭ muzyčnuju płatformu

Muzyčny startap Grai ź biełaruskimi karaniami nabyŭ płatformu sacyjalnaha prasłuchoŭvańnia muzyki Hangout. Jaje stvaryli aŭtary servisu Turntable.fm. Suma i inšyja ŭmovy ździełki nie raskryvajucca, piša Office Life.

Fota: Grai

Kampaniju Grai zasnavali biełarusy Illa Lasun, Dźmitryj Kamaroŭski i Andrej Aŭsievič. Raniej, z 2019 hoda, jany pracavali nad dadatkam dla redahavańnia videa Vochi, jaki paźniej nabyŭ Pinterest. Ciapier Grai z dapamohaj štučnaha intelektu raspracoŭvaje i ekśpierymientuje z novymi muzyčnymi praduktami. U krasaviku startap pryciahnuŭ 9 miljonaŭ dalaraŭ inviestycyj.

Paśla nabyćcia Hangout Grai płanuje padtrymlivać i raźvivać partniorskija suviazi, jakija płatforma ŭžo naładziła z muzyčnymi łejbłami, vydaviectvami i arhanizacyjami kalektyŭnaha kiravańnia aŭtarskimi pravami. Kampanii chočuć stvaryć płatformu novaha pakaleńnia dla sacyjalnaha muzyčnaha stryminhu.

Zasnavalnik Hangout Džozef Pierł raskazaŭ, što prajekt stvarali jak sprobu pieranieści ŭ anłajn atmaśfieru sumiesnaha prasłuchoŭvańnia muzyki. Ideja zaklučałasia ŭ tym, kab uznavić situacyju, kali siabry siadziać razam u pakoi, pieradajuć adzin adnamu płaścinki i słuchajuć muzyku jak ahulny dośvied, a nie prosta indyvidualna ŭklučajuć kampazicyi.

Suzasnavalnik Grai Andrej Aŭsievič adznačyŭ, što muzyka dla jaho zaŭsiody była źviazanaja ź ludźmi, pakolki jaho dziadula śpiavaŭ u opiernym teatry. Pavodle jaho słoŭ, kamanda Hangout pakazała, nakolki mocna ludzi chočuć abjadnoŭvacca vakoł muzyki i nie tolki naciskać knopku «prajhrać», ale i bolš aktyŭna ŭzajemadziejničać ź joj. U Grai ličać, što budučynia stryminhu źviazana z sacyjalnym uzajemadziejańniem i sumiesnaj tvorčaściu, a sučasnyja technałohii štučnaha intelektu dazvalajuć raźvivać hety kirunak.

U žniŭni Grai stała adnoj ź dźviuch pieršych kampanij, jakija atrymali licenziju na patenty Music IP Holdings. Jany rehulujuć vykarystańnie zapisanaj muzyki ŭ spałučeńni z technałohijami štučnaha intelektu — ad aŭtaryzacyi da ažyćciaŭleńnia vypłat.

Publičny zapusk Grai čakajecca ŭ najbližejšy čas. Kampanija ŭžo adkryła zapis u śpis čakańnia.

Kamientary da artykuła