U Biełarusi možna całkam zakonna pradavać i kuplać kvatery i mašyny za dalary. Voś jak heta zrabić
Raźliki ŭ Biełarusi adbyvajucca vyklučna ŭ biełaruskich rublach, ale jość sposab, jaki dazvalaje fizičnym asobam raźličvacca ŭ dalarach ci jeŭra. Mnohija pra takuju mahčymaść navat nie zdahadvajucca.
Ilustracyjny zdymak. Fota: «Naša Niva»
Raźlik u valucie zabaronieny, ale jość niuans
U Biełarusi histaryčna tak skłałasia, što ceny na nieruchomaść, aŭtamabili i inšy darahi transpart pryviazanyja da dalara.
Pry hetym raźliki ŭ valucie zakon zabaraniaje, choć de-fakta ździełki, pry jakich fizičnyja asoby raźličvajucca pamiž saboj najaŭnymi dalarami ci jeŭra, — zvyčajnaja sprava.
Niahledziačy na raspaŭsiudžanaść takich apieracyj, farmalna jany źjaŭlajucca davoli hrubym parušeńniem zakonu, jakoje praduhledžvaje štraf ad 50 da 100 bazavych z patencyjnaj kanfiskacyjaj hrošaj. Aproč taho, takija raźliki niasuć dadatkovyja ryzyki ŭ vyhladzie atrymańnia falšyvych kupiur.
Ale ŭ Biełarusi isnuje całkam zakonny sposab dla fizičnych asobaŭ raźličycca dalarami, jeŭra ci inšaj valutaj za kvateru abo mašynu i pry hetym być upeŭnienymi ŭ tym, što kupiury nie falšyvyja.
Jak takoje mahčyma?
Reč u tym, što šerah bankaŭ prapanuje svajo pasrednictva pry raźliku za nieruchomaść abo mašynu ŭ valucie.
Schiema pracuje tak: pradaviec i pakupnik znachodziać bank, jaki akazvaje pasłuhi pa biaśpiečnym raźliku (u roznych bankach nazva pasłuhi moža adroźnivacca: «Biaśpiečnaja ździełka», «Nadziejny płaciež» i hetak dalej).
Skrynšot: bsb.by
U adździaleńni banka zaklučajecca trochbakovaja damova pamiž pradaŭcom, bankam i pakupnikom.
Bank adkryvaje pa dva rachunki pakupniku i pradaŭcu: adzin u biełaruskich rublach, druhi — u valucie.
Dalej pakupnik unosić u kasu najaŭnyja dalary abo inšuju valutu, supracoŭnik banka praviaraje hrošy i pa śpiecyjalnym kursie abmieńvaje na rubli dy zaličvaje na rublovy rachunak pakupnika.
Paśla hrošy pieravodziać na rublovy rachunak pradaŭca i znoŭ ža pa śpiecyjalnym kursie abmieńvajuć na dalary, jakija pradaviec moža adrazu zabrać najaŭnymi.
Skrynšot: belveb.by
Usio praściej, čym mahło zdavacca
Pryčym na sajtach niekatorych bankaŭ u apisańni pasłuhi adrazu paznačana, što vydača najaŭnaj zamiežnaj valuty pradaŭcu ažyćciaŭlajecca tolki kupiurami, pryniatymi ad pakupnika.
Pakolki dla padobnych apieracyj bankami vyznačajecca «indyvidualny» kurs, vydatki na takija ździełki možna nazvać minimalnymi.
U zaležnaści ad sumy i banka takaja apieracyja abydziecca ŭ 100—500 rubloŭ.
Pry hetym buduć vykanany ŭsie farmalnaści, jakija patrabujuć raźliku pa damovie za kvateru abo mašynu ŭ rublach, a pradaviec budzie na 100% upeŭnieny, što ź im raźličylisia sapraŭdnymi kupiurami, bo bank praviaraje hrošy pierad tym, jak pryniać ich u pakupnika.
Sam praces davoli chutki i ŭ zaležnaści ad sumy zajmaje kala 30 chvilin.
Takim čynam, biełarusy de-fakta majuć mahčymaść całkam zakonna ažyćciaŭlać raźliki ŭ valucie pry kupli-prodažy nieruchomaści abo aŭtamabila.