Nacyjanalny mastacki muziej pradstaviŭ abnoŭleny katałoh «100 šedeŭraŭ»

Nacyjanalny mastacki muziej pradstaviŭ druhoje, abnoŭlenaje vydańnie katałoha «100 šedeŭraŭ». Prezientacyja adbyłasia ŭ miežach mierapryjemstva «Vieraśnioŭskaja noč u Mastackim». Jak i pieršaje vydańnie, jakoje vyjšła ŭ 2014 hodzie, novy katałoh padtrymała kampanija ITMS Biełaruś, hienieralny partnior muzieja, piša ahienctva «Minsk-Naviny».

Ideja sabrać sto najbolš značnych tvoraŭ z muziejnaj kalekcyi ŭ adnoj knizie ŭźnikła bolš za 12 hadoŭ tamu. Śpiecyjalistam treba było vybrać tolki 100 rabot z bolš čym 30 tysiač ekspanataŭ, kab pradstavić u vydańni roznyja epochi, mastackija škoły i kirunki. Pieršy katałoh byŭ vielmi zapatrabavanym i całkam razyšoŭsia prykładna za dva hady.

U novym vydańni try asnoŭnyja raździeły. Jany pryśviečanyja biełaruskamu mastactvu XVI—XX stahodździaŭ, rasijskamu mastactvu XVIII—XX stahodździaŭ, a taksama redkim i ŭnikalnym uzoram zachodniejeŭrapiejskaha i ŭschodniaha mastactva. Kožny raździeł maje ŭstupny artykuł muziejnych śpiecyjalistaŭ, a kožny tvor supravadžajecca karotkim apisańniem i ilustracyjaj. Katałoh vydadzieny na biełaruskaj, ruskaj i anhlijskaj movach.

Vydańnie dazvalaje ŭbačyć nie tolki tvory z pastajannaj ekspazicyi, ale i častku muziejnaha zboru, jakaja ciapier zachoŭvajecca ŭ fondach. Pavodle viadučaj navukovaj supracoŭnicy muzieja Nadziei Vusavaj, kala 15—20 pradstaŭlenych u katałohu tvoraŭ zaraz nie ekspanujucca. U budučyni niekatoryja ź ich mohuć źjavicca ŭ abnoŭlenaj ekspazicyi novaha korpusa muzieja.

Druhoje vydańnie atrymała novuju dyzajnierskuju kancepcyju. U knizie vykarystanyja čorna-biełyja mastackija fatahrafii, jakija pakazvajuć architekturu muziejnych załaŭ, elemienty ampiru i hieamietryju muziejnaj prastory. Akramia taho, u šerahu tvoraŭ paśla novych daśledavańniaŭ byli ŭdakładnienyja atrybucyjnyja źviestki i inšaja navukovaja infarmacyja.

Pradstaŭniki muzieja adznačyli, što takija katałohi dazvalajuć praciahnuć znajomstva z muziejnaj kalekcyjaj za miežami vystavačnych załaŭ, viarnucca da ŭžo ŭbačanych tvoraŭ i paznajomicca z tymi, jakija pakul nie pradstaŭlenyja ŭ ekspazicyi.

Vydańnie «100 šedeŭraŭ» stała praciaham 25‑hadovaha supracoŭnictva Nacyjanalnaha mastackaha muzieja z ITMS Biełaruś. Za hety čas kampanija padtrymała šerah sumiesnych vystavačnych, vydavieckich i fotaprajektaŭ. Nastupnym supolnym prajektam pavinna stać ustalavańnie ŭ muziei sučasnaha infakijoska z afišaj i multymiedyjnaj infarmacyjaj dla naviedvalnikaŭ.

Novaje vydańnie «100 šedeŭraŭ» možna nabyć u suvienirnaj kramie Nacyjanalnaha mastackaha muzieja ŭ Minsku na vulicy Karła Marksa, 24. Katałoh raźličany jak na amataraŭ mastactva, tak i na mastactvaznaŭcaŭ, daśledčykaŭ i studentaŭ.

Kamientary da artykuła