Paśla Litvy Džon Koŭł naviedaŭ i Łatviju

Śpiecpasłańnik prezidenta ZŠA pa Biełarusi Džon Koŭł 17 vieraśnia naviedaŭ Ryhu. Tam jon sustreŭsia z premjer-ministram Łatvii Andrysam Kułbierhsam, ministram zamiežnych spraŭ i kiraŭnikom Dziaržaŭnaj pamiežnaj słužby krainy. Pra vizit paviedamiła ambasada ZŠA ŭ Łatvii.

Džon Koŭł i Andrys Kułbierhs. Fota: facebook.com/usembassyriga

U Ryhu, jak paviedamlajecca, Koŭł pryjechaŭ, kab bolš daviedacca pra prablemy biaśpieki na ŭschodniaj miažy Łatvii, a taksama abmierkavać mahčymaści supracoŭnictva pamiž ZŠA i Łatvijaj.

Padčas sustrečy z Andrysam Kułbierhsam asablivuju ŭvahu baki nadali biaśpiecy łatvijskaj miažy ź Biełaruśsiu i Rasijaj, supraćdziejańniu nielehalnaj mihracyi, jakuju łatvijskija ŭłady źviazvajuć ź dziejańniami biełaruskaha režymu, a taksama namahańniam ZŠA pa vyzvaleńni palityčnych źniavolenych u Biełarusi.

Kułbierhs nazvaŭ ZŠA stratehičnym sajuźnikam i važnym partnioram Łatvii. Jon adznačyŭ značeńnie amierykanskaj vajskovaj prysutnaści ŭ krainie i praktyčnaj padtrymki ŭ abaronie ŭschodniaj miažy. Pavodle jaho słoŭ, umacavańnie łatvijskaj miažy adnačasova ŭzmacniaje biaśpieku Jeŭrapiejskaha sajuza i NATA.

Łatvijski premjer taksama stanoŭča acaniŭ vyzvaleńnie 25‑ci biełaruskich palitviaźniaŭ, ale padkreśliŭ, što ŭ dziejańniach biełaruskich uładaŭ istotnych palapšeńniaŭ nie nazirajecca.

Pavodle mierkavańnia Kułbierhsa, biełaruski režym praciahvaje represii suprać hramadstva, padtrymlivaje rasijskuju ahresiju suprać Ukrainy i vykarystoŭvaje mihracyju jak instrumient hibrydnaj ataki. U suviazi z hetym Łatvija ličyć nieabchodnym zachoŭvać palityčny i sankcyjny cisk dy padtrymlivaje pašyreńnie i ŭzmacnieńnie sankcyj Jeŭrasajuza.

Akramia pytańniaŭ biaśpieki, padčas sustrečy paćvierdžanaja zacikaŭlenaść Łatvii ŭ pahłybleńni ekanamičnaha supracoŭnictva sa Złučanymi Štatami i pryciahnieńni novych amierykanskich inviestycyj.

Kamientary da artykuła