Pad Stolinam užo druhi raz za hod pradali šlachieckuju siadzibu ź viežaj-absiervatoryjaj

Siadziba Alešaŭ z chatniaj absiervatoryjaj u Stolinskim rajonie narešcie zdabyła novaha haspadara na placoŭcy «BUTB-Majomaść». Papiaredniaja nibyta ŭdałaja sproba pradać dvaranskaje hniazdo sarvałasia praz admovu ŭ apošni momant papiaredniaha kupca, adnak paŭtornyja tarhi zaviaršylisia vynikova, piša Domovita.by.

Tarhi za staradaŭni kompleks u pasiołku Nova-Bieražnoje Stolinskaha rajona na płatformie BUTB-majomaść prachodzili vielmi aktyŭna — na kuplu pretendavali dva ŭdzielniki, jakija za 2,5 hadziny zrabili 33 staŭki. U vyniku pačatkovaja cana vyrasła ŭ 4,3 raza: z 12 892 rubloŭ da pieramožnych 54 792 rubloŭ (prykładna $18 110). Novym uładalnikam majontka stała pryvatnaja budaŭničaja arhanizacyja ź Pinska.

Krynica: Poshyk.Info

Cikava, što viasnoj za hety samy łot zmahalisia kudy aktyŭniej. Tady cana ŭźlacieła amal da 128 200 rubloŭ, ale pieramožca tarhoŭ z ahraharadka Alšany taho ž Stolinskaha raptoŭna pieradumaŭ nabyvać siadzibu pierad samym padpisańniem papier. Hetym razam abyšłosia biez dramy, i abjekt narešcie pierajšoŭ u ruki profilnaha biznesu.

Krynica: Jandeks

Razam z hałoŭnym budynkam i staradaŭniaj ladoŭniaj inviestar atrymaje prava arendy ziamielnaha ŭčastka płoščaj kala 37 sotak terminam na 50 hadoŭ.

Darečy, pry ŭsim byłym histaryčnym minułym u budynka niama aficyjnaha statusu materyjalnaj historyka-kulturnaj kaštoŭnaści. Sama siadziba była pabudavanaja ŭ 1890 hodzie i naličvaje kala 426 kvadratnych mietraŭ ahulnaj płoščy. Uzvodzili dom z dobraj čyrvonaj cehły, pryčym miascovyja lehiendy śćviardžajuć, što kožnuju cahlinu pryvozili na budoŭlu zahornutaj u papieru. Budynak vykanany ŭ styli nieahotyki sa strymanym dekoram, łučkovymi voknami i terasaj. Atrymałasia stylna, nadziejna i biez zališniaj mudrahielistaści.

Krynica: Jandeks

Samaja krutaja fiška majontka chavajecca z boku parku — heta hranionaja dvuchpaviarchovaja vieža. Apošni ŭładalnik majontka Kanstancin Aleša byŭ čałaviekam prahresiŭnym, vučyŭsia ŭ Hiermanii i vielmi lubiŭ astranomiju. U hetaj samaj viežy jon uładkavaŭ sapraŭdnuju chatniuju absiervatoryju, kab nazirać za zorkami ŭ teleskop. Darečy, z hetaha ž dvaranskaha rodu pachodzić viadomy saviecki piśmieńnik Juryj Aleša.

Da majontka prymykaje piejzažny anhlijski park płoščaj 5 hiektaraŭ, zakładzieny niamieckim sadoŭnikam Karłam Bajziertam. Na hetaj terytoryi zachavalisia redkija vidy dreŭ, uklučajučy čornuju sasnu i listoŭnicu Kiempfiera. Ciapier terytoryja trochi adzičeła, ale ŭsio jašče vyhladaje nievierahodna atmaśfierna.

Krynica: Jandeks

U saviecki čas dvaranskija zały vykarystoŭvalisia jak zvyčajnyja kvatery dla rabotnikaŭ miascovaha śpirtzavoda. Z hadami žychary raźjechalisia, dom zakansiervavali i jon pačaŭ pavolna razburacca. Uličvajučy turystyčny patencyjał Paleśsia, tut moža źjavicca stylny zaharadny hatel, atmaśfierny restaran abo atmaśfiernaja baza adpačynku.

Kamientary da artykuła