Chłopiec vyviez za miažu 10 tysiač dalaraŭ piensijanierki i schavaŭ pad drevam. Atrymaŭ na «abied» 100 rubloŭ
20‑hadovy rabotnik staličnaj AZS staŭ kurjeram machlaroŭ.
Usio pačałosia z paviedamleńnia ŭ miesiendžary. Nieviadomy pradstaviŭsia supracoŭnikam Biełpošty i skazaŭ, što pryjšoŭ zakazny list ad Ministerstva adukacyi, a kab jaho atrymać, treba nazvać šaściznačny kod, jaki pryjšoŭ na elektronnuju poštu. Chłopiec tak i zrabiŭ.
Adrazu paśla hetaha jamu patelefanavali pa videasuviazi i stali pierakonvać, što machlary ŭžo vykarystoŭvajuć hetyja danyja dla pieravodu hrošaj na zamiežnyja rachunki ad jaho imia. Spałochaŭšysia kryminalnaj adkaznaści, chłopiec pahadziŭsia vykonvać «kanfidencyjnyja zadańni», kab dakazać svaju nievinavataść.
Jaho paprasili sustrecca z pažyłoj žančynaj, zabrać u jaje pakiet z hrašyma i vyvieźci hrošy za miažu. Chłopcu skazali, što piensijanierka sama stała achviaraj machlaroŭ i na jaje aformili kredyt, a jon dapamahaje jaje vyratavać.
Małady čałaviek zrabiŭ usio, jak jamu zahadali: zabraŭ u žančyny bolš za 10 tysiač dalaraŭ, advioz ich za miažu i schavaŭ pad drevam u abumoŭlenym miescy. Za svaju pracu jon atrymaŭ ad «kuratara» kala 100 rubloŭ «na abied» i zahad viartacca ŭ Minsk.
Zatym jaho zatrymali. U milicyi pravodziać pravierku.