U Daniecku ŭzarvali zabojcu hienierała ŭkrainskaj raźviedki. Pra apieracyju maŭčali bolš za miesiac
Ukrainskija śpiecsłužby ŭzarvali aŭtamabil Aleha Šutava. Jon, jak śćviardžaje SBU, asabista ŭ Kijevie padkłaŭ bombu pad mašynu hienierał-majora vajskovaj raźviedki Ukrainy Maksima Šapavała.
Aleha Šutava ŭzarvali 27 lipienia ŭ akupavanym Daniecku, piša LB.ua sa spasyłkaj na krynicy va ŭkrainskich śpiecsłužbach.
Samarobnuju vybuchovuju pryładu zakłali ŭ Subaru, na jakim Šutaŭ pryjechaŭ da spartyŭnaha kompleksu «Dynama» ŭ Leninskim rajonie Daniecka.
Šutaŭ sadzicca ŭ aŭto
Miascovyja prarasijskija resursy tady paviedamlali pra «načnuju ataku bieśpiłotnika», u vyniku jakoj nibyta paciarpieŭ kiraŭnik fiederacyi spartyŭnaj baraćby.
MNS tušyć mašynu Šutava
Šutaŭ sapraŭdy ŭznačalvaŭ asacyjacyju dziudo i samba tak zvanaj DNR, adnačasova Šutaŭ byŭ supracoŭnikam tak zvanaha «Centra śpiecyjalnych apieracyj Ministerstva dziaržaŭnaj biaśpieki DNR». U 2024 hodzie hetaje viedamstva likvidavali, a jaho funkcyi pieradali miascovamu ŭpraŭleńniu FSB.
Słužba biaśpieki Ukrainy ŭpieršyniu publična nazvała Šutava zabojcam hienierał-majora Maksima Šapavała ŭ krasaviku 2019 hoda.
Maksim Šapavał
«Mienavita hety čałaviek 26 červienia 2017 hoda zakłaŭ vybuchovuju pryładu pad aŭtamabil hienierała ŭkrainskaj raźviedki Maksima Šapavała. Siońnia my ŭpieršyniu abnarodujem detali vykanaŭcy hetaha terarystyčnaha aktu», — zajaŭlaŭ tahačasny kiraŭnik SBU Vasil Hrycak.
Šutaŭ źniaŭ kvateru ŭ domie, dzie žyŭ Šapavał, a taksama arandavaŭ miesca na parkoŭcy pobač z mašynaj hienierała. 27 červienia 2017 hoda aŭtamabil Šapavała ŭzarvaŭsia ŭ Sałamianskim rajonie Kijeva. Hienierał zahinuŭ. Pavodle SBU, praz hadzinu paśla vybuchu Šutaŭ zabraŭ rečy z arandavanaj kvatery i vyjechaŭ u Rasiju, a adtul — na Danbas.
Šutava taksama źviazvali z zabojstvam načalnika adździeła kontrraźviedki SBU ŭ Danieckaj vobłaści pałkoŭnika Alaksandra Charabieruša. Jaho aŭtamabil uzarvali ŭ Maryupali 31 sakavika 2017 hoda.
Infarmacyju pra likvidacyju Šutava nie publikavali bolš za miesiac ź mierkavańniaŭ biaśpieki — pakul dyviersijnaja hrupa nie viarnułasia z akupavanaj terytoryi.