Pad Enhielsam rasstralali hienierała rasijskaj stratehičnaj avijacyi
Achviaraj zamachu ŭ Sarataŭskaj vobłaści staŭ hienierał-major Mikałaj Varpachovič — kamandzir 22‑j hvardziejskaj ciažkaj bambardzirovačnaj avijacyjnaj dyvizii Rasii. Ukraina padazraje jaho ŭ arhanizacyi rakietnych udaraŭ pa cyvilnych abjektach. Hienierał znachodzicca ŭ krytyčnym stanie, śćviardžaje telehram-kanał «Dośje špiona».
Napad adbyŭsia 3 vieraśnia kala 7:00 u pasiołku Prabudžeńnie, jaki miažuje z Enhielsam.
Pavodle telehram-kanała, nieviadomy padpilnavaŭ Varpachoviča kala jaho pryvatnaha doma i dvojčy streliŭ ź pistaleta — u tvar i žyvot.
Napadnik, jaki pierasoŭvaŭsia na matacykle i chavaŭ tvar pad šlemam, uciok. Zatrymać jaho nie ŭdałosia.
Raniej pra napad paviedamili prakramloŭskija kanały Mash, SHOT i Baza, ale imia paranienaha nie nazyvali. Jany pisali, što aficera Pavietrana-kaśmičnych sił Rasii dastavili ŭ balnicu ŭ ciažkim stanie. Pavodle Baza, padčas stralby byŭ paranieny taksama jaho kiroŭca.
22‑ia avijacyjnaja dyvizija, jakoj, pavodle adkrytych źviestak, kamanduje Varpachovič, bazujecca ŭ Enhielsie. U jaje skład uvachodzić 121‑y ciažki bambardzirovačny avijacyjny połk, uzbrojeny stratehičnymi bambardziroŭščykami Tu-95MS — nośbitami kryłatych rakiet Ch-101.
Ukrainskaje śledstva ličyć, što Varpachovič addaŭ zahad nanieści 1 sakavika 2022 hoda rakietny ŭdar pa kijeŭskaj televiežy. Tady zahinuli piać mirnych žycharoŭ, u tym liku 12‑hadovaja dziaŭčynka, jašče šeść čałaviek byli paranienyja. U lutym 2026 hoda hienierału zavočna abviaścili padazreńnie ŭ parušeńni zakonaŭ i zvyčajaŭ vajny, spałučanym z naŭmysnym zabojstvam.
Rasijskija ŭłady pakul aficyjna nie paćviardžali ni asoby paranienaha, ni abstavin zamachu.