Uładzimir Arłoŭ trapiŭ u finał prestyžnaj polskaj litaraturnaj premii

Biełaruski piśmieńnik Uładzimir Arłoŭ z tvoram «Tancy nad horadam. Try historyi» (u pierakładzie Bahdana Zadury) trapiŭ u lik siami finalistaŭ Centralnajeŭrapiejskaj litaraturnaj premii «Anhiełus». Uznaharodu štohod uručaje Urocłaŭski Dom Litaratury za najlepšuju knihu prozy, napisanuju pa-polsku, albo pierakładzienuju na polskuju movu, piša Budzma.org.

Sioleta ŭ lik finalistaŭ uvajšli:

• Uładzimir Arłoŭ (Biełaruś);
• Siarhiej Žadan (Ukraina);
• Hieorhij Haspadzinaŭ (Bałharyja);
• Julija Ilucha (Ukraina);
• Milena Markavič (Sierbija);
• Kataržyna Tučkava (Čechija);
• Jaana Čečat (Polšča).

«Ja pierakanany, što siarod sioletnich naminantaŭ jość i budučyja łaŭreaty Nobieleŭskaj premii», — kaža staršynia žury premii Andrej Chadanovič.

Uračystaje abviaščeńnie łaŭreataŭ premii adbudziecca 17 kastryčnika va Urocłavie. Heta budzie častkaj fiestyvalu Bruna Šulca, padčas jakoha zapłanavanyja siarod inšaha čytańni ŭryŭkaŭ naminavanych tvoraŭ i dyskusija z udziełam pierakładčykaŭ i pierakładčyc.

Pieramožca atrymaje ŭznaharodu ŭ pamiery 150 000 złotych (kala 40,6 tysiačy dalaraŭ), i heta robić «Anhiełus» najvyšejšaj litaraturnaj uznaharodaj, jakaja prysudžajecca ŭ Polščy, u finansavym płanie. Akramia taho, pryzy ŭ pamiery 5 000 złotych (kala 1355 dalaraŭ) uručajucca ŭsim aŭtaram i aŭtarkam, čyje knihi vyjšli ŭ finał.

Kamientary da artykuła