«Dajcie fota mrazi». Cichanoŭski atakavaŭ humarysta Džypsinkova. Toj adkazaŭ
«Chto jon, što jon i dzie pracuje, budziem raźbiracca», — pahražaje Cichanoŭski.
Michaił «Džypsinkoŭ» Cyhankoŭ supravadziŭ svajo «pakajańnie» tym fota, jakoje publikavali siłaviki paśla jaho zatrymańnia ŭ studzieni 2022 hoda.
Džypsinkoŭ — papularny biełaruski tvitar-błohier, čyje žarty razychodziacca pa ŭsim internecie. Michaił Cyhankoŭ — heta sapraŭdnaje imia błohiera — časta śmiajecca i na palityčnyja temy. I tut u jaho adbyłosia nieparazumieńnie ź Siarhiejem Cichanoŭskim. Kanflikt raźliŭsia adrazu na niekalki sacsietak — i na fejsbuk, i na tredsy, i na tvitar.
Kali Cichanoŭski anansavaŭ vajnu z «Našaj Nivaj», Džypsinkoŭ udakładniŭ u jaho: «Heta rašučy ŭdar pa našanivizmu?» Kamientar sabraŭ u čatyry razy bolš łajkaŭ, čym startavy dopis Cichanoŭskaha.
A ŭ tvitary Džypsinkoŭ napisaŭ: «Siarhiej Cichanoŭski z razmacham abviaściŭ vajnu niezaležnym ŚMI».
Heta vyklikała aburanuju reakcyju z boku Cichanoŭskaha.
Siarhiej Cichanoŭski
«Siaroha, a što heta za Džypsinkoŭ. Jon pastajanna hadzić i lije dziarmo ŭ tvitary. Ja dumaŭ, heta prapahanda Łuki. Heta naš, ci što? Dajcie fota mrazi i apisańnie, chto jon, što jon i dzie pracuje, budziem raźbiracca», — spytaŭ Cichanoŭski ŭ Siarhieja Sparyša — inšaha byłoha palitviaźnia, paplečnika Volhi Karač i nienaviśnika Śviatłany Cichanoŭskaj.
Sparyš dla daviedki nakidaŭ u adkaz spasyłak na raniejšyja intervju Džypsinkova.
«I čo jana ŭzłavanaja takaja, hetaja mraź? Čamu jaje nazyvajuć lehiendaj tvitara?» — zadaŭsia nastupnym pytańniem Cichanoŭski.
Džypsinkoŭ adkazaŭ palityčnamu dziejaču. Svoj «pakajalny adkaz» jon supravadziŭ tym fota, jakoje publikavali siłaviki paśla jaho zatrymańnia ŭ studzieni 2022 hoda.
«Cyhankoŭ Michaił Jurjevič, 1995 hoda naradžeńnia, h. Babrujsk. Pracuju ŭ mižnarodnaj IT kampanii, zadavajcie pytańni», — pradstaviŭsia jon pa-biełarusku. Ale dla kamunikacyi ź Cichanoŭskim pierajšoŭ na ruskuju: «Pišu na zrazumiełaj [movie]. Ja, Cyhankoŭ Michaił Jurjevič, chacieŭ by paprasić prabačeńnia za toje, što maje prykoły tak doŭha vyvodzili tvaju ambicyjnuju dušu paeta z raŭnavahi. Abiacaju, što ŭsie nastupnyja buduć lepšyja i śvist flahi budzie čutny ad štata Georgia da Georgia».
«Davodzić spravu da sudoŭ za abrazy my nie budziem, my ž prystojnyja ludzi. Raźbiaremsia śmiešnymi karcinkami i kałamburami», — padsumavaŭ jon.
I pačaŭ pościć miemy na temu.
«Budziem źbirać padabajki na mahutny ŭdar pa Cichanizmu», — abviaściŭ Džypsinkoŭ