«Zabudźciesia pra X. Ptuška viarnułasia». Źjaviŭsia novy Twitter
Były juryst Twitter zapuściŭ sacsietku Twitter.now z novym padychodam da maderacyi i zmahajecca za brend ź Iłanam Maskam.
Były juryst kampanii Twitter Styvien Koŭts zapuściŭ u testavym režymie novuju sacyjalnuju sietku Twitter.now, pra što paviedamlaje vydańnie Business Insider. Startap Operation Bluebird prapanuje pryncypova novuju madel maderacyi kantentu, dzie zamiest centralizavanych ałharytmaŭ uzrovień niepažadanaha abo niesapraŭdnaha materyjału ŭ svajoj stužcy vyznačajuć sami karystalniki.
Zasnavalniki prajekta zajaŭlajuć pra viartańnie lehiendarnaha simvała sacsietki i prapanujuć karystalnikam admovicca ad suviazi z płatformaj Iłana Maska: «Zabudźciesia pra vaš X. Ptuška viarnułasia», — napisaŭ Styvien Koŭts, anansujučy zapusk płatformy.
Dla maderacyi kantentu Twitter.now vykarystoŭvaje sistemu štučnaha intelektu VERA, jakaja praviaraje śćviardžeńni, dadaje kantekst i prysvojvaje dopisam rejtynh davieru. U budučyni karystalniki zmohuć zadavać indyvidualny «paroh» hetaha rejtynhu, kab aŭtamatyčna adfiltroŭvać fejki dy abrazy.
Kampanija X padała ŭ sud na startap za parušeńnie pravoŭ na tavarny znak, adnak Operation Bluebird śćviardžaje, što Mask faktyčna admoviŭsia ad brenda «Twitter», nazvy «tweet» i łahatypa z ptuškaj paśla rebrendynhu.
Padčas słuchańniaŭ akruhovy sudździa Kołm F.Koneli adznačyŭ: «Ja źbirajusia zrabić adnu vysnovu: ja nie znajšoŭ, kab X pradstaviła pierakanaŭčyja dokazy vykarystańnia «tweet» abo łahatypa z ptuškaj. Ale ja jašče nie vyznačyŭsia adnosna vykarystańnia «Twitter». Heta toje, u čym mnie spatrebilisia b dadatkovyja tłumačeńni».
Zaraz Twitter.now pracuje ŭ abmiežavanym veb-režymie dla niekalkich socień karystalnikaŭ, a rańniaja rehistracyja i reziervavańnie niknejma kaštuje 20 dołaraŭ.