Biełarusu Mirasłavu Łazoŭskamu paśmiarotna prysvoili zvańnie hanarovaha hramadzianina Roŭna

13 žniŭnia deputaty Rovienskaj haradskoj rady paśmiarotna nadali zvańnie «Hanarovy hramadzianin Roŭna» 201 abaroncu Ukrainy. Siarod ich — biełarus Mirasłaŭ Łazoŭski. U śpisie hanarovych hramadzian horada jon ciapier značycca pad numaram 655, piša «Radyjo Svaboda».

Mirasłaŭ Łazoŭski

U śpisie hanarovych hramadzian Roŭna adznačajecca, što Mirasłaŭ Łazoŭski nibyta byŭ hramadzianinam Ukrainy:

«Łazoŭski Mirasłaŭ Uładzimiravič — hramadzianin Ukrainy, jaki zahinuŭ (pamior), abaraniajučy niezaležnaść, suvierenitet i terytaryjalnuju cełasnaść Ukrainy ŭ rasijska-ukrainskaj vajnie, braŭ niepasredny ŭdzieł u ažyćciaŭleńni mierapryjemstvaŭ pa zabieśpiačeńni nacyjanalnaj biaśpieki i abarony, davańni adporu i strymlivańni zbrojnaj ahresii suprać Ukrainy».

Jašče ŭ studzieni 2024 hoda Rovienskaja haradskaja rada vyrašyła nazvać imiem Mirasłava Łazoŭskaha adnu z novych vulic na ŭskrainie horada.

Mirasłaŭ Łazoŭski, viadomy pad pazyŭnym «Myš», naradziŭsia ŭ Minsku 10 lipienia 1973 hoda. Skončyŭ Biełaruski nacyjanalny techničny ŭniviersitet. U 1995 hodzie ŭstupiŭ u Biełaruskaje zhurtavańnie vajskoŭcaŭ. U tym ža hodzie jon staŭ adnym z zasnavalnikaŭ spartova-patryjatyčnaj arhanizacyi «Bieły lehijon», jakaja dziejničała ŭ Biełarusi da pačatku 2000‑ch hadoŭ i zajmałasia vychavańniem i navučańniem moładzi. Byŭ papularyzataram biełaruskaj kultury, supracoŭničaŭ z vydaviectvam, braŭ udzieł u knižnych kirmašach. 

Paśla pačatku masavych represij u Biełarusi naprykancy leta 2021‑ha Mirasłaŭ pierajechaŭ va Ukrainu. Zahinuŭ jon 16 maja 2023 hoda pry abaronie Bachmuta ad rasijskich zachopnikaŭ.

Kamientary da artykuła