Ukraina atrymała partyju rakiet da Patriot

Ukraina atrymała dadatkovuju partyju rakiet dla zienitna-rakietnych kompleksaŭ Patriot. Pra heta zajaviŭ prezident Ukrainy Uładzimir Zialenski paśla samitu «Kaalicyi achvotnych» u Kijevie na sustrečy z prezidentam Estonii Ałaram Karysam.

Fota: Efrem Lukatsky / AP

Kolkaść pieradadzienych rakiet i krainu, jakaja ich pastaviła, Zialenski nie nazvaŭ. Pavodle jaho słoŭ, bojeprypasaŭ pryjšło pakul niašmat, tamu Ukrainie patrebnyja dadatkovyja pastaŭki.

Akramia rakiet dla Patriot, partniory pieradali Ukrainie niekalki zienitnych kompleksaŭ Crotale razam z rakietami da ich. Taksama kraina atrymała rakiety AIM, jakija vykarystoŭvajucca dla pierachopu rasijskich rakiet.

Padčas samitu byli ŭzhodnienyja i inšyja pakiety dapamohi dla asobnych rehijonaŭ Ukrainy. Bielhija i Danija padtrymali Mikałajeŭski napramak, Estonija — Žytomirskuju vobłaść. Bielhija i Hiermanija taksama padrychtujuć asobnyja pakiety dapamohi ŭ enierhietyčnaj śfiery. Šviecyja vydaść srodki na vytvorčaść ukrainskich bieśpiłotnikaŭ. Akramia taho, udzielniki sustrečy padtrymali niekalki prajektaŭ dla vieteranaŭ.

Raniej Zialenski kazaŭ, što dla zabieśpiačeńnia efiektyŭnaj supraćpavietranaj abarony Ukrainy ŭ zimovy pieryjad nieabchodna nie mienš za 300 rakiet dla Patriot. Pavietranyja siły Ukrainy aceńvali patrebu prykładna na 360 rakiet.

Ukrainski prezident taksama papiaredžvaŭ, što hetaj zimoj rasijskija vojski mohuć zasiarodzić rakietnyja ŭdary pa Kijevie.

Kamientary da artykuła