U Kijevie prapanujuć pieravieści škoły na dystancyjnaje navučańnie
«U takich umovach, kali načnyja abstreły adbyvajucca niekalki razoŭ na tydzień, niemahčyma paŭnavartasna chadzić u škołu, bo jany navat narmalna vyspacca nie mohuć, pakolki vymušanyja amal usiu noč siadzieć va ŭkryćci», — havorycca ŭ tekście pietycyi.
Fota: Evgeniy Maloletka / AP
U Kijevie stvaryli pietycyju z zaklikam pieravieści navučańnie ŭ škołach na dystancyjny farmat. Aŭtarka zvarotu ličyć, što praz uzmacnieńnie rasijskich atak dzieci znachodziacca ŭ pastajannym stresie, a vočnaje navučańnie ŭ takich umovach źjaŭlajecca niebiaśpiečnym, piša RBK-Ukraina.
«U takich umovach, kali načnyja abstreły adbyvajucca niekalki razoŭ na tydzień, niemahčyma paŭnavartasna chadzić u škołu, bo jany navat narmalna vyspacca nie mohuć, pakolki vymušanyja amal usiu noč siadzieć va ŭkryćci», — havorycca ŭ tekście pietycyi.
Taksama aŭtarka nahadvaje, što padčas pandemii i ŭ pačatku poŭnamaštabnaj vajny ŭkrainskija škoły ŭžo pracavali dystancyjna, tamu, na jaje dumku, vučniaŭ nie varta abaviazvać naviedvać navučalnyja ŭstanovy pry ciapierašniaj situacyi ź biaśpiekaj.
Pietycyju zarehistravana 5 žniŭnia. Kab jaje razhledzieła Kijeŭskaja haradskaja ŭłada, jana pavinna nabrać 6 tysiač podpisaŭ na praciahu 60 dzion.
Hetaj zimoj paśla maštabnych rasijskich abstrełaŭ značnaja častka Kijeva zastavałasia biez aciapleńnia. Z-za hetaha ŭ niekatorych rajonach časova abjadnoŭvali škoły i dziciačyja sady, kab zachavać vočny farmat navučańnia. Akramia hetaha, u studzieni šerah škoł va Ukrainie pieraviali na dystancyjnaje navučańnie praz rezkaje pachaładańnie. U niekatorych navučalnych ustanovach praciahnuli zimovyja kanikuły.
Raniej były ministr adukacyi Oksien Lisavy zajaŭlaŭ, što paśla načnych abstrełaŭ dzieciam možna nie iści ŭ škołu, kali jany źniasilenyja. Nahnać prapuščanyja viedy jany zmohuć paśla adnaŭleńnia sił.