Babaryka zojmiecca biznesam — užo adkryŭ kampaniju ŭ Hiermanii
Eks-pretendent na vybarach-2020 uładkoŭvaje svajo žyćcio na voli. Čym zajmajecca Viktar Babaryka, jak prachodzić jaho adaptacyja, ci źbirajecca viartacca ŭ palityku? Hetyja pytańni jamu zadało Polskaje radyjo dla zamiežža.
Fota: Lookby.Media
— Ja ciapier znachodžusia ŭ Hiermanii, žyvu ŭ Bierlinie, i časam nazyvaju siabie vip-emihrantam, bo niejkija pracedury i, napeŭna, niejkija mahčymaści, jakija źjavilisia dziakujučy pramomu zaprašeńniu ŭrada Hiermanii, a taksama pradastaŭleńnie mnie biežanstva abo prytułku z boku Hiermanii, niejkim čynam, viadoma ž, dapamahajuć, i vielmi dobra dapamahajuć biełarusy Bierlina, jakija tut jość.
Vielmi dobra byŭ pastaŭleny pryjom, zabieśpiačeńnie, prachodžańnie miedycynskaha ahladu, pradastaŭleńnie miedycynskich pasłuh. Na siońniašni momant praktyčna vyrašany ŭsie pytańni pa dakumientach, heta značyć u mianie jość pašpart zamiežnika dla padarožžaŭ, U mianie jość niamieckaje ID, u mianie jość strachoŭka niamieckaja, ja zarehistravany ŭ džob-centry i atrymlivaju dapamohu. Pobytavyja pytańni vyrašanyja.
Ja, narešcie, vyrašyŭ prablemu z razumieńniem taho, čym budu zajmacca z punktu hledžańnia svajho žyćciazabieśpiačeńnia. Adna z asnoŭnych častak majho žyćcia budzie pryśviečana biźniesu. Ja zarehistravaŭ kampaniju ŭ Niamieččynie, sfarmavaŭ razumieńnie kompleksu pasłuh, jakija hetaja kampanija budzie akazvać. Užo viadu pieramovy ab zaklučeńni kantraktaŭ. Ahulny kirunak — heta kansałtynh i transfarmacyja ludziej i kampanij u AI Native Life i AI Native Company.
Ja vielmi chaču viarnucca ŭ Biełaruś. Adpaviedna, ja chaču žyć u Biełarusi, ja chaču pracavać u Biełarusi, ja chaču prynosić karyść, u pieršuju čarhu, viadoma, u Biełarusi. Tamu pry luboj mahčymaści, i navat u tym liku i ŭ ramkach taho, čym ja budu zajmacca, adzin z samych hałoŭnych pryjarytetaŭ — ci moža heta być karysna biełarusam.
— Ci źbirajecca Viktar Babaryka zajmacca palitykaj? Ci bačyć svajo miesca na palityčnym poli?
— Dla mianie palityk — heta čałaviek, jaki albo vałodaje instrumientami ŭłady, albo zmahajecca za toje, kab vałodać hetymi instrumientami ŭłady. I tamu ja mahu dakładna skazać, što ŭ 2020 hodzie, kali ja vyłučyŭ svaju kandydaturu, ja dakładna chacieŭ być palitykam. Voś tut u mianie niama nijakich sumnievaŭ, ja heta paćviardžaju.
Skazać, što ja ciapier zmahajusia za toje, kab stać palitykam, atrymać kresła prezidenta, napeŭna, heta budzie niapravilna. I tamu z hetaha punktu hledžańnia ja nie palityk. Ale ja vyrazna sabie ŭjaŭlaju, što palityčnaje pole, partniory i ludzi, ź jakimi my supracoŭničajem, abo prajekty, jakimi my zajmajemsia i budziem zajmacca, biezumoŭna, źviazanyja z tymi, chto zajmajecca palitykaj. Tamu ja, napeŭna, skažu, što ja čałaviek, jaki ŭ tym liku budzie pracavać na palityčnym poli. Voś, napeŭna, tak.
— Šmat dla kaho ŭ 2020 hodzie było dziŭna čytać i słuchać pra ŭpeŭnienaść Babaryki ŭ tym, što jon zdoleje pieramahčy na vybarach. Adkul heta ŭpeŭnienaść? Šmat chto dumaŭ i dumaje, što sprava ŭ niehałosnaj padtrymcy Rasii.
— Dumaju, ja niešta zrabiŭ, kab stać tym, kim ja staŭ. Razam sa svajoj žonkaj my zrabili vydatnuju siamju. Razam sa svaimi kalehami my zrabili adzin ź lepšych bankaŭ. Razam z bankam my zrabili mnostva kłasnych prajektaŭ. Łahičnaje raźvićcio ŭsioj hetaj spravy — razam zrabić lepšuju krainu. I zdavałasia, što voś hetyja pasyły, jakija ja dasyłaŭ, mahli b ukłaścisia ŭ toje, kab chtości pryjšoŭ i skazaŭ: «Davaj zrobim razam». Ale čamuści ŭ 2020 hodzie nichto mnie hetaha nie prapanavaŭ.
Dla mianie heta było evalucyjnaje raźvićcio. Ja pavinien byŭ zrabić hety krok. Ja pavinien zrabić toje, što mahu dla taho, kab nie tolki bank, nie tolki prajekty, ale i kraina, jak mnie zdajecca, mahła žyć lepš.
Biełaruś — heta što? I režym, i ŭrad, i kraina — heta ludzi. Dyk voś, u niekatorych ludziej atrymlivajecca, u niekatorych nie atrymlivajecca. Kali ŭ mianie atrymlivajecca, kali ŭ mianie jość historyja pośpiechu, čamu ja nie mahu hetuju historyju pośpiechu padoŭžyć?
Ja nie źbirajusia vas pierakonvać u čymści, navošta mnie heta rabić. U čym vyjaŭlajecca, jak možna daviedacca, padtrymka majho rašeńnia ŭ vidavočnym vyhladzie ci ŭ nievidavočnym? U vas jość źviestki pra padtrymku Rasijaj majho vyłučeńnia?
Kali ja pryniaŭ hetaje rašeńnie, ja, jak adkazny mieniedžar, biezumoŭna, patelefanavaŭ členam savieta dyrektaraŭ i paviedamiŭ pra svajo rašeńnie. Tamu što ja najomny mieniedžar, ja heta abaviazany zrabić. Ja parušyŭ peŭny rehłamient, tamu što pra takija rečy treba kazać za miesiac. I ja prapanavaŭ dva varyjanty: adpravić mianie ŭ adpačynak, što, uvohule, było b łahična, i tady było dobra, albo zvolnić.
Ułasna, na praciahu sutak, ja tak razumieju, prajšli kansultacyi, i varyjant, što mianie adpraviać na miesiac u adpačynak, byŭ pryznany drennym. I mianie zvolnili za dzień. I ŭ vyniku, kali ja išoŭ i padavaŭ dakumienty, ja ŭsiudy sumlenna pisaŭ, što ja idu jak biespracoŭny.
— Padziei 9 žniŭnia i paśla nie byli absalutna ŭnikalnymi dla Biełarusi. I ŭ 1996-m, i ŭ 2006-m, i ŭ 2020‑m ludziej źbivali, zatrymlivali i davali vialikija terminy kandydatam u prezidenty. Čamu taki scenar nie razhladaŭsia Babarykam? Što dla jaho było niečakanaściu? I chto ž vinavaty?
— Ja absalutna pierakanany, što adziny varyjant sapraŭdnaj demakratyi heta tady, kali narod vybiraje svaju ŭładu. Ja vieru i dahetul pierakanany ŭ tym, što nadydzie čas, i ja dla hetaha zrablu toje, što ja mahu zrabić, kab u Biełarusi sfarmavalisia ŭmovy, pry jakich nasamreč možna budzie vybirać svaju ŭładu biełaruskamu narodu, tuju, jakuju jon paličyć patrebnaj.
Toje, što za heta prava, jakoje było vykazana 9 žniŭnia 2020 hoda, biełaruski narod zapłaciŭ takuju vielizarnuju canu, i što jana budzie takoj, mahu ščyra skazać, što tak, ja nie dumaŭ, što budzie takaja cana. Heta praŭda. Ni dla mianie, ni dla majho syna, ni dla maich siabroŭ, ni dla biełaruskaha naroda.
Voś heta ja dakładna mahu skazać. Ale ja čamuści nie pamiataju nivodnaha narmalnaha, aficyjna ci nieaficyjna apublikavanaha materyjału, va ŭsiakim vypadku da 18 červienia, dzie było skazana, što dziejańni Babaryki i toje, što tady adbyvajecca, zavieršycca tym, što ŭsich pierasadžajuć. Voś čahości ja takoha nie pamiataju.
— Ci varta čakać akna mahčymaściaŭ, jakim jano budzie dla Biełarusi? Što budzie ź sistemaj biaśpieki i «ruskim śvietam»?
— Akno mahčymaściaŭ jość zaŭsiody i ŭsiudy. Nie byvaje absalutnaha tupika. Vyjście zaŭsiody jość. Ja prahramist u minułym žyćci, ja zaŭsiody viedaju, što adnaho kirunku niama. Zaŭsiody jość «tak» ci «nie». Tamu jak minimum dva varyjanty jość. Raz jość dva varyjanty, značyć, akno mahčymaściaŭ zaŭsiody isnuje. Jakoje jano?
Dla mianie, naprykład, całkam vidavočna, kali prosta dyskretna. U Biełarusi jość dva varyjanty. Heta značyć, albo jana pierastanie isnavać, albo jana ŭsio ž taki zastaniecca niezaležnaj krainaj. Pakul voś heta samaja, mnie zdajecca, vialikaja ryzyka. Toje, što adbyłosia paśla 2020 hoda, nastolki ščylna pryviazała Biełaruś da Rasii, uklučajučy ŭdzieł našaj krainy ŭ vajnie, što varyjantaŭ, ja b skazaŭ tak, vyrvacca stała jašče mienš, čym było ŭ 2020 hodzie. Tamu pahroza straty niezaležnaści rezka pavialičyłasia. Heta majo mierkavańnie.
Ja absalutna pierakanany, što padziei 2020 hoda nie adbylisia b, kali b nie było padtrymki z boku Rasii. Ja nie kažu, što jany vinavatyja, ale kali b nie było padtrymki, napeŭna, takoj ža žorstkaści i strachu takoha nie było. Ale heta adna historyja.
Druhaja, kali ŭsio ž nam usim razam, u tym liku i mnie, udasca zrabić usio mahčymaje, kab hetaha nie adbyłosia, uklučajučy namahańni i na palityčnym poli, kab, kali budzie sfarmiravana novaja kanstrukcyja biaśpieki paśla hetaj žorstkaj vajny, raźviazanaj Rasijaj, i status Biełarusi, kali ŭžo nie budzie vyznačany dakładna jak niezaležnaj krainy, to chacia b budzie pradmietam dalejšaha abmierkavańnia.
Kali ŭ ramkach voś hetaj kanstrukcyi budzie skazana, što heta ŭsio ž taki śfiera ŭpłyvu «ruskaha śvietu», to akno mahčymaściaŭ zastaniecca nastolki mizernym, što, nu, nie viedaju…