Biełaruskaja škoła ŭ Varšavie abviaščaje piaty nabor
Samyja vialikija kłasy — pačatkovyja, tam pa 7—8 čałaviek. A samy małaliki kłas — siomy, piša Radyjo Svaboda.
Biełaruskaja škoła ŭ Varšavie była zasnavanaja ŭ 2022 hodzie jak anłajn– i afłajn-prastora dla biełaruskich dziaciej, jakija apynulisia ŭ Polščy i inšych krainach śvietu paśla padziej 2020 hoda. Pačynali čatyry hady tamu sa 150 vučniaŭ i 15 nastaŭnikaŭ.
U 2024 hodzie kolkaść achvotnych vučycca ŭ Varšavie i filijałach škoły ŭ roznych haradach Polščy dasiahała paŭtysiačy, raskazvaje dyrektar škoły spadar Aleś.
«Adnak filijały škoły, jakija byli ŭ siami haradach Polščy, ciapier pracujuć samastojna. Škoła zastałasia tolki ŭ Varšavie, tamu dziaciej značna mienš. Samyja vialikija — pačatkovyja kłasy. Tam pa 7—8 čałaviek, a samy małaliki kłas — siomy. Tam tolki dvoje vučniaŭ.
Viedaju prykładnuju kolkaść biełaruskich navučencaŭ u polskich škołach — a heta kala 30 tysiač, tamu mnie soramna nazyvać sapraŭdnuju kolkaść dziaciej u biełaruskich škołkach, jakich u horadzie niekalki. Tamu źviartajusia da suajčyńnikaŭ: prajavicie patryjatyčnuju aktyŭnaść», — zaklikaje spadar Aleś.
Viedy pa asnoŭnych pradmietach junyja biełarusy atrymlivajuć u škołach, licejach i himnazijach u krainach, dzie jany ciapier žyvuć, a voś pradmiety biełaruskaha kampanienta vyvučajuć mienavita ŭ Biełaruskaj škole ŭ Varšavie. Tut vykładajuć biełaruskuju movu i litaraturu, historyju, hieahrafiju, mastactva Biełarusi, a taksama suśvietnaje mastactva.
Afłajn-zaniatki prachodziać pa subotach. Dzieci majuć mahčymaść kantaktavać ź biełaruskamoŭnymi adnahodkami i nastaŭnikami.
Razam jany zajmajucca, viesialacca na pierapynkach, razvučvajuć biełaruskija pieśni i tancy, siabrujuć, uspaminajuć rodnyja i nie takija blizkija miaściny.
Dyrektar škoły spadar Aleś padkreślivaje, što kancepcyja navučańnia va ŭstanovie hruntujecca na tym, što prahramy pradmietaŭ źviazanyja z aficyjnymi biełaruskimi adukacyjnymi prahramami, što nadaje navučańniu sistemnaść.
«Našy vučni nie adstajuć ad svaich adnahodkaŭ na radzimie i pry spryjalnych umovach mohuć biez strat praciahnuć vučobu ŭ Biełarusi. Tym bolš što kłasifikacyju kłasaŭ my zachavali raniejšaj. Ale ŭ nas adsutničaje naviaźlivy ideałahičny składnik biełaruskich dapamožnikaŭ. Zamiest hetaha nastaŭniki padbirajuć materyjały z najlepšych uzoraŭ biełaruskaj i suśvietnaj litaratury i kultury, jakija vychoŭvajuć luboŭ da Baćkaŭščyny, raźvivajuć nacyjanalnuju identyčnaść i viernaść pryncypam demakratyi. Nastaŭniki — ludzi ź vialikim vopytam pracy, majuć vysokija prafiesijnyja katehoryi ŭ śfiery adukacyi, źjaŭlajucca pieramožcami konkursaŭ. Mnohija majuć vučonyja stupieni kandydataŭ i daktaroŭ navuk», — zapeŭnivaje dyrektar Biełaruskaj škoły ŭ Varšavie spadar Aleś.
Ministerstva adukacyi Polščy štohod daje biełaruskim dzieciam mahčymaść biaspłatna zajmacca ŭ sučasna abstalavanych navučalnych kabinietach.