Biełaruski mužčynski chor «Kasary» źniaŭsia ŭ trecim siezonie papularnaha polskaha sieryjała «1670»
Udzielniki biełaruskaha mužčynskaha choru «Kasary» pryniali ŭdzieł u zdymkach treciaha siezona paśpiachovaha polskaha sieryjała «1670». Jany hrali ŭkraincaŭ. Dziela rolaŭ niekatorym muzykam navat daviałosia pajści na surjoznyja achviary.
Usie fota: sasha.drahavoz / Instagram
Jak paviedamiŭ u instahramie ŭdzielnik choru Saša Drahavoz, jon źniaŭsia ŭ prajekcie razam z kalektyvam «Kasary».
«My hrali ŭkrainskich kazakaŭ, jakija śpiavajuć i łupiać u vieličezny bubien. Heta była adna z samych viasiołych pryhod minułaha leta», — napisaŭ jon.
Dziela ŭdziełu ŭ zdymkach jamu daviałosia pajści na achviary i zhalić vusy z baradoj, jakija jon «nasiŭ litaralna pałovu žyćcia».
«Kasary» — heta mužčynski vakalny ansambl z šaści biełarusaŭ, stvorany ŭ 2023 hodzie ŭ Varšavie. Hurt rekanstrujuje staražytnyja formy šmathałosnaha mužčynskaha śpievu Uschodniaj Jeŭropy na asnovie archiŭnych zapisaŭ.
«1670» — papularny polski satyryčny kamiedyjny sieryjał ad Netflix, jaki raspaviadaje pra žyćcio i pryhody drobnaha šlachcica. Heta paradyjnaje aśviatleńnie šlachietnaha pobytu, sacyjalnych prablem i histaryčnych realij praz pryzmu sučasnaha, časta niepalitkarektnaha, humaru.