«Nie abaviazanyja». Strachavaja kampanija admoviła biełarusu ŭ padaŭžeńni polisa paśla bujnoj vypłaty
Biełaruski pradprymalnik dva hady sumlenna pryvodziŭ klijentaŭ u «Biełnaftastrach» i nabyŭ dla siabie darahi strachavy polis z pavyšanym limitam vypłat. Ale varta było jamu atrymać surjoznuju traŭmu i atrymać naležnuju strachavuju vypłatu, jak paśpiachovaje supracoŭnictva skončyłasia. U kampanii kažuć, što i tak vypłaty vysokija.
U strachavoj kampanii mužčynu zajavili, što praciahvać ź im damovu «niemetazhodna», bo polis pavinien prynosić prybytak, a nie straty, piša Myfin.by.
U Piatra ŭłasnaja kampanija ŭ śfiery mikraturyzmu. Jaho klijenty aktyŭna vyjazdžajuć na konnyja maršruty i spłaŭlajucca na bajdarkach. Kab maksimalna zaścierahčy ludziej padčas padarožžaŭ, pradprymalnik uvioŭ abaviazkovaje strachavańnie ad traŭmaŭ i niaščasnych vypadkaŭ.
— Za dva hady maja kampanija zastrachavała ŭ «Biełnaftastrachu» kala sotni turystaŭ, pryniosšy strachavoj kampanii stabilny i davoli dobry prybytak. Ja vyrašyŭ zastrachavać i siabie, ale standartny limit vypłaty 5 tysiač rubloŭ mianie nie zadavalniaŭ.
Pakolki bujnyja strachavyja sumy (zvyš 20 tysiač rubloŭ) patrabujuć uzhadnieńnia z kiraŭnictvam kampanii, Piatru ŭ indyvidualnym paradku ŭchvalili maksimalnuju strachavuju sumu ŭ 50 tysiač rubloŭ. U vyniku jon zapłaciŭ za polis bolš za 1 200 rubloŭ. Suma niemałaja, ale na zdaroŭi mužčyna ekanomić nie chacieŭ.
Prykładna praz paŭhoda adbyŭsia strachavy vypadak.
— Ja ŭpaŭ z rovara i złamaŭ dźvie kostki ŭ łokci. Lačeńnie zaciahnułasia bolš čym na try miesiacy, a reabilitacyja praciahvajecca i ciapier. Za pierałom «Biełnaftastrach» vypłaciŭ mnie 5 tysiač rubloŭ.
U červieni Piotr mocna parezaŭ nahu padčas čarhovaha spłavu. Tydzień pralažaŭ u balnicy, a kali pryjšoŭ afarmlać vypłatu, vyśvietliłasia, što termin dziejańnia polisa ŭžo skončyŭsia.
— Akazałasia, što nichto i nie źbiraŭsia nahadvać mnie pra padaŭžeńnie, choć raniej mieniedžary zaŭsiody zahadzia telefanavali. U hetaj ža kampanii ja strachuju i inšyja abjekty, u tym liku aŭtamabil, i tam takich prablem nikoli nie ŭźnikała. Na pytańnie, čamu mianie nie papiaredzili, u «Biełnaftastrachu» adkazali, što nie abaviazanyja hetaha rabić, i spasłalisia na toje, što dasyłajuć apaviaščeńni ŭ Viber, jakoha ŭ mianie naohuł niama na telefonie.
U centralnym ofisie biźniesmiena nakiravali ŭ druhoje adździaleńnie, dzie i ahučyli sapraŭdnuju pryčynu: u padaŭžeńni strachoŭki admoŭlena, bo strachavać jaho dalej «niemetazhodna» — papiaredniaja vypłata za złamany łokać była zanadta vialikaj.
— Atrymlivajecca, strachavym kampanijam cikava atrymlivać unioski tolki ad tych klijentaŭ, jakija nikoli nie traŭmirujucca. Źmianšać strachavuju sumu ja sam admoviŭsia, a praciahvać damovu na raniejšych umovach kampanija nie zachacieła.
Pavodle słoŭ Piatra, heta ŭžo druhi vypadak, kali bujny strachoŭščyk jaho padvioŭ. Raniej, znachodziačysia ŭ Hruzii, jon atrymaŭ traŭmu nahi, majučy polis dla tych, chto vyjazdžaje za miažu. Miascovyja lekary pamyłkova zamiest pierałomu dyjahnastavali zvyčajny ŭdar. Piotr vyrašyŭ nie tracić hrošy strachavoj kampanii za miažoj i viarnuŭsia dalečvacca ŭ Biełaruś.
— Adnak u vypłacie mnie admovili, spasłaŭšysia na biurakratyčny niuans: pakolki dapamoha nie była akazana ŭ Hruzii, zamiežny polis nie dziejničaje, a dla Biełarusi patrebna asobnaja strachoŭka. Atrymlivajecca, ja zekanomiŭ hrošy kampanii, a sam zastaŭsia biez vypłaty.
Mienavita paśla taho vypadku Piotr i aformiŭ biełaruski polis na 50 tysiač rubloŭ. Ale varta było adbycca pieršamu surjoznamu strachavomu vypadku, jak kampanija vypłaciła hrošy i adrazu paśla hetaha admoviłasia praciahvać damovu na nastupny termin.
Strachavaja kampanija: my skarystalisia svaim pravam
My paprasili pradstaŭnikoŭ strachavoj kampanii prakamientavać hetuju situacyju. Voś jaki adkaz atrymali:
«Piotr zaklučyŭ sa strachavoj kampanijaj «Biełnaftastrach» u pieryjad z 2024 hoda pa červień 2026 hoda 15 damovaŭ strachavańnia.
Ź ich: try — abaviazkovaha strachavańnia hramadzianskaj adkaznaści ŭładalnikaŭ transpartnych srodkaŭ, vosiem — dobraachvotnaha strachavańnia ad niaščasnych vypadkaŭ i zachvorvańniaŭ na čas pajezdak za miažu ŭ dačynieńni da siabie i členaŭ svajoj siamji, jašče čatyry — dobraachvotnaha strachavańnia ad niaščasnych vypadkaŭ u dačynieńni da siabie. Ahulnaja suma vypłačanych strachavych unioskaŭ skłała 1 243,68 rubla.
Za nazvany pieryjad strachavaja kampanija trojčy (ŭ lipieni 2024 hoda, lipieni 2025 hoda i žniŭni 2025 hoda) ažyćciaŭlała Piatru strachavyja vypłaty ŭ suviazi z nadychodam strachavych vypadkaŭ.
Uzrovień vypłat pa hetym strachavalniku skłaŭ 507%.
Z ulikam takoha ŭzroŭniu vypłat i aceńvajučy mahčymyja ryzyki budučych pieryjadaŭ, kampanija skarystałasia svaim pravam admović u zaklučeńni dahavora dobraachvotnaha strachavańnia (art. 391 Hramadzianskaha kodeksa Respubliki Biełaruś).
Što datyčycca infarmavańnia strachavalnikaŭ, to ZAST «Biełnaftastrach», jak klijentaaryjentavanaja kampanija z vysokimi standartami absłuhoŭvańnia, nadaje vialikuju ŭvahu servisu i, kali klijent daŭ zhodu na atrymańnie paviedamleńniaŭ u Viber u miežach supravadžeńnia dahavoraŭ strachavańnia, zaŭsiody dasyłaje napaminy pra nieabchodnaść apłaty čarhovaha ŭznosu abo pra zakančeńnie terminu dziejańnia dahavora strachavańnia».