Pamior futbolny kalekcyjanier, jaki apranaŭ moładź u majki z Łukašenkam
U Breście pamior viadomy futbolny kalekcyjanier Hieorhij Darbuašvili. Niekalki hadoŭ tamu ŭ jaho dyjahnastavali ankałahičnaje zachvorvańnie, piša «Anłajnier».
Hieorhij Darbuašvili
Infarmacyju pra śmierć Hieorhija Darbuašvili «Anłajnieru» paćvierdzili ŭ futbolnym kłubie «Dynama» (Brest).
Hieorhij Darbuašvili naradziŭsia ŭ Paŭnočnaj Asiecii, u dziacinstvie zajmaŭsia volnaj baraćboj. Va ŭzroście 13 hadoŭ razam z baćkam pierajechaŭ u Paŭdniovuju Asieciju, dzie praciahvaŭ zaniatki sportam.
Paśla słužby ŭ vojsku adpraviŭsia ŭ Rastoŭ-na-Donie, kab praciahnuć spartyŭnuju karjeru. Na adnym z turniraŭ jaho zaŭvažyŭ brescki trenier Mikałaj Budkievič, jaki zaprasiŭ maładoha barca pierajechać u Brest. U 1983 hodzie jon pierabraŭsia ŭ Biełaruś, dzie žyŭ da kanca žyćcia.
Z 1985 hoda pracavaŭ u Breście instruktaram pa spartova-masavaj rabocie ź dziećmi. Praz hod zasnavaŭ žanočy futbolny kłub «Viktoryja», jaki ŭ 1995 hodzie staŭ čempijonam Biełarusi.
U 2010 hodzie byŭ abrany deputatam Bresckaha haradskoha Savieta deputataŭ i tady sumna prasłaviŭsia na ŭsiu Biełaruś. 21 listapada ŭ Breście prajšoŭ matč pamiž bresckim «Dynama» i babrujskaj «Biełšynaj». Padčas matča na stadyjonie znachodzilisia kala 30 dziaciej i padletkaŭ, apranutych u roznakalarovyja majki z partretam Łukašenki i nadpisam «Naš priezidient».
Fota: Gazetaby.com
Inicyjataram hetaj akcyi byŭ jakraz Hieorhij Darbuašvili. U pierapynku šou praciahnułasia, na biehavoj darožcy ŭznaharodžvali maładych futbalistaŭ i futbalistak Bresckaj vobłaści, jakija taksama byli apranutyja ŭ takija ž majki.
Hieorhij Darbuašvili ŭ majcy z Łukašenkam
Taksama Darbuašvili prasłaviŭsia jak kalekcyjanier. Jon sabraŭ unikalnuju kalekcyju spartyŭnych artefaktaŭ i byŭ viadomy hetym daloka za miežami Bresta.