Hramadzianie Biełarusi ŭpieršyniu atrymali status biežancaŭ u Izraili

Izrailskaje vydańnie «Haarec» paviedamiła, što ŭpieršyniu hramadzianie Biełarusi byli aficyjna pryznanyja biežancami ŭ Izraili. Havorka idzie pra siamiejnuju paru, jakaja ŭdzielničała ŭ pratestach 2020 hoda.

Fota: vecteezy.com

Pavodle infarmacyi vydańnia, 2 žniŭnia, praz čatyry hady paśla padačy zajavy, muž i žonka atrymali paviedamleńnie ab nadańni im statusu biežancaŭ.

Nie nazvanyja pa imionach muž i žonka, jakim kala 50 hadoŭ, brali ŭdzieł u pratesnych akcyjach u 2020 hoda. Nieŭzabavaje paśla pačatku vajny va Ukrainie, u sakaviku 2022 hoda, paśla zatrymańnia ich znajomaj pary dali zrazumieć, što jany taksama mohuć stać nastupnymi.

U krasaviku 2022 hoda muž i žonka vyjechali ŭ Izrail, a praz try miesiacy źviarnulisia z prośbaj ab nadańni statusu biežancaŭ.

Razhlad spravy biełarusaŭ zaciahnuŭsia. Tamu jany źviarnulisia ŭ apielacyjny sud pry Upraŭleńni rehistracyi nasielnictva i mihracyi. Sud pastanaviŭ, što dziaržava pavinna pryniać rašeńnie pa ich spravie da studzienia 2027 hoda, ale admoviŭ u časovym statusie na pieryjad čakańnia.

Paśla hetaha biełarusy abskardzili rašeńnie ŭ akruhovym sudzie. Jon abaviazaŭ dziaržavu vydać im časovy dazvoł na znachodžańnie da taho času, pakul ich chadajnictva nie budzie kančatkova razhledžana.

Pavodle danych, jakija «Haarec» atrymaŭ ad izrailskaha Upraŭleńnia rehistracyi nasielnictva i mihracyi, u pieryjad z 2019 pa 2024 hod było razhledžana 288 zajavak na atrymańnie statusu biežanca, ź jakich zadavolili tolki 21.

Pry hetym siarod spraŭ, jakija za hety čas byli pieradadzienyja na razhlad kansultatyŭnaj kamisii pa spravach biežancaŭ, raniej nie było nivodnaj spravy hramadzian Biełarusi.

Kamientary da artykuła