Minsk staŭ samym papularnym zamiežnym horadam dla rasijskich turystaŭ

Minsk letam 2026 hoda staŭ samym papularnym zamiežnym horadam dla arhanizavanych turystaŭ z Rasii. Pra heta śviedčyć daśledavańnie servisu braniravańnia «Astravok V2V», jaki praanalizavaŭ zakazy turahienctvaŭ na červień—žnivień.

Minsk. Fota: vecteezy.com

U paraŭnańni ź minułym letam kolkaść braniravańniaŭ raźmiaščeńnia ŭ biełaruskaj stalicy pavialičyłasia na 14%. Akramia taho, u dziasiatku samych zapatrabavanych rasijanami haradoŭ dla paznavalnaha turyzmu ŭvajšli Jerevan, Tbilisi, Ałmaty, Astana, Hrodna, Taškient, Brest, Baku i Viciebsk. U cełym kožnaje druhoje zamiežnaje braniravańnie rasijskich turahientaŭ hetym letam prypadaje na krainy byłoha SSSR.

Pavodle mierkavańnia pradstaŭnikoŭ kampanii, Biełaruś uznačaliła rejtynh dziakujučy dobraj transpartnaj dastupnaści, adsutnaści składanaściaŭ z apłataj, raźvitaj turystyčnaj infrastruktury i mahčymaści padabrać adpačynak na luby biudžet.

Siarod dalokich zamiežnych napramkaŭ najbolšuju papularnaść u rasijan nabirajuć krainy Azii. Lidaram haradskoha turyzmu staŭ Šanchaj, dzie kolkaść braniravańniaŭ vyrasła na 27%. Vysokim popytam taksama karystajucca Piekin, Huandžou, Tokia i Banhkok. Rost cikavaści da Kitaja tłumačać biaźvizavym režymam i pašyreńniem pramych avijaznosin pamiž rasijskimi haradami i kitajskimi miehapolisami.

U siehmiencie plažnaha adpačynku pieršaje miesca ŭ rasijan zaniaŭ Batumi, dzie kolkaść braniravańniaŭ pavialičyłasia ŭ 1,4 raza. Zapatrabavanymi taksama zastajucca kurorty Abchazii — Hahry, Suchumi, Novy Afon i Picunda. Siarod inšych papularnych miescaŭ dla adpačynku rasijskija turysty vybirajuć tureckija kurorty Antalju, Ałaniju i Kiemier, a taksama vjetnamskija Niačanh i Dananh i tajłandskaja Pataju i Pchukiet.

Kamientary da artykuła