Brat Koli Łukašenki buduje farmaceŭtyčny kompleks za $10 miljonaŭ
Pradpryjemstva budzie znachodzicca ŭ admysłovaj ekanamičnaj zonie «Vialiki kamień», piša «Biuro».
U Biełarusi źjaviŭsia novy bujny hulec na farmaceŭtyčnym rynku — zasnavanaje naprykancy 2024 hoda ZAT «FarmaSajns», jakoje ŭ traŭni 2026 hoda atrymała status rezidenta industryjalnaha parku «Vialiki kamień».
Jak vyśvietliła rasśledavalniki «Biuro», adnym z čatyroch zasnavalnikaŭ kampanii staŭ Dźmitryj Abielski — doktar-aftalmołah i starejšy syn kiraŭnicy lečkamisii, sienatarki i mamy Koli Iryny Abielskaj.
Razam ź im siarod bienieficyjaraŭ značacca Aleh Paźniak — suzasnavalnik i top-mieniedžar sietki aftalmałahičnych klinik Voka dy Andrej i Valeryj Jaramčuki, čyja siamja kantraluje farmkampaniju «Farmtechnałohija».
Novaje tavarystva zasnavała prajekt pa budaŭnictvie ŭłasnaha zavoda, jaki budzie śpiecyjalizavacca na vypusku kroplaŭ dla vačej.
Prajekt aceńvajecca ŭ 10 miljonaŭ dołaraŭ i praduhledžvaje vychad na mahutnaść da 10 miljonaŭ upakovak u hod da 2027—2028 hadoŭ.
Dla pryciahnieńnia pieršasnych srodkaŭ na zakupku abstalavańnia i naładku pracesaŭ kampanija vypuściła ablihacyi na 3,5 miljona rubloŭ. U dalejšym inviestary raźličvajuć atrymlivać nie mienš za 3 miljony rubloŭ čystaha prybytku štohod pry vyručcy ŭ 10 miljonaŭ rubloŭ.