Biełarus zapuściŭ resurs dla manitorynhu vydačy DNŽ u roznych haradach Polščy
Sam Uładzisłaŭ taksama čakaje kartu pobytu ŭ Biełastoku. Užo trynaccaty miesiac minuŭ z momantu padačy dakumientaŭ.
«Poznań: u vieraśni 2025 hoda — padača zajavy na DNŽ (Blue Card), u śniežni — zdača adbitkaŭ palcaŭ, u červieni 2026 hoda — stanoŭčaje rašeńnie». Prykładna takuju infarmacyju pra lehalizacyju ŭ roznych haradach Polščy štodnia źbiraje biełarus Uładzisłaŭ. U červieni jon zapuściŭ telehram-kanał z kalendarom atrymańnia DNŽ i raskazaŭ Most, navošta heta patrebna.
Sam Uładzisłaŭ taksama čakaje kartu pobytu ŭ Biełastoku. Užo trynaccaty miesiac minuŭ z momantu padačy dakumientaŭ.
Padstavaj dla atrymańnia dazvołu źjaŭlajecca viadzieńnie indyvidualnaj pradprymalnickaj dziejnaści. Mužčyna ŭžo zdaŭ adbitki palcaŭ — heta abaviazkovaja pracedura pry lehalizacyi. Jon miarkuje, što atrymaje rašeńnie prykładna praz try miesiacy. Taki prahnoz surazmoŭca robić, analizujučy dośvied inšych zamiežnikaŭ (pieravažna biełarusaŭ i ŭkraincaŭ), jakija prajšli hety šlach krychu raniej.
Uładzisłaŭ raspačaŭ hety prajekt, kab lepš razumieć ułasnyja pierśpiektyvy atrymańnia dakumientaŭ. Spačatku jon źbiraŭ statystyku tolki pa Padlaskim vajavodstvie, dzie žyvie. Ale paśla jamu pačali pisać biełarusy ź inšych rehijonaŭ i pytacca, jak iduć spravy tam. Tak źjavilisia asobnyja raździeły dla kožnaha vajavodstva.
Stvaralnik kanała kožny viečar źbiraje infarmacyju z adkrytych krynic: biełarusy i ŭkraincy časta dzielacca svaim dośviedam u tematyčnych hrupach. Adnak ich paviedamleńni razroźnienyja i niaredka hublajucca. Uładzisłaŭ ža viadzie tolki kalandar. Pavodle jaho słoŭ, heta dazvalaje karystalnikam adsočvać situacyju ŭ svaim rehijonie, pa svaim typie DNŽ (časovy pobyt, stały pobyt abo karta rezidenta) i pa svajoj padstavie (praca, uźjadnańnie siamji, viadzieńnie biźniesu i inšaje).
— Heta daje adčuvańnie spakoju, — tłumačyć jon svaju zadumu. — Naprykład, miesiac tamu ja zdaŭ adbitki palcaŭ. Heta narmalna, što maju spravu jašče nie pačali razhladać, što palicyja jašče nie prychodziła z pravierkaj? Hladziš na čužy dośvied i razumieješ, kali ŭžo varta turbavacca, a kali — nie.
U cełym, ličyć Uładzisłaŭ, sabrany dośvied paćviardžaje danyja aficyjnaj statystyki, jakaja publikujecca ź nievialikaj zatrymkaj. Ale kali dziaržaŭnyja orhany padajuć infarmacyju ŭ abahulnienym vyhladzie, to realnyja historyi dazvalajuć kankretnamu karystalniku adsočvać vypadki, jakija maksimalna padobnyja da jaho ŭłasnaha. Heta asabliva važna ŭ rehijonach, dzie za inśpiektarami zamacavanyja peŭnyja katehoryi spraŭ. Naprykład, tak adbyvajecca ŭ Varšavie.
Praca Uładzisłava ŭžo dazvoliła zrabić pieršyja vysnovy pra rabotu novaha modula MOS-2, zapuščanaha ŭ kancy krasavika. Ciapier padača zajavy na DNŽ u Polščy adbyvajecca ŭ elektronnym vyhladzie praz hety modul. Pavodle jaho nazirańniaŭ, u piaci haradach — Krakavie, Urocłavie, Łodzi, Poznani i Varšavie — zajavy, padadzienyja praz MOS-2, užo pačali razhladać (zajaŭnikaŭ vyklikajuć dla zdačy adbitkaŭ palcaŭ). A ŭ Krakavie i Łodzi ŭžo jość pieršyja vypadki, kali pa takich zajavach vyniesieny stanoŭčyja rašeńni.
Pakul biełarus raźvivaje prajekt na vałanciorskich pačatkach. Adnak nie vyklučaje, što kali servis budzie zapatrabavanym, to ŭ budučyni pasprabuje jaho manietyzavać.