Adziny NPZ Hruzii admaŭlajecca ad rasijskaj nafty

Adziny ŭ Hruzii naftapierapracoŭčy zavod poŭnaha cykłu, raźmieščany ŭ porcie Kulevi, u žniŭni—vieraśni całkam spynić zakupki rasijskaj nafty i piarojdzie na pierapracoŭku syraviny z Kazachstana i Livii.

NPZ u Kulevi. Fota: portnews.ru

Takoje rašeńnie pryniała kampanija Black Sea Petroleum LLC (BSP) paśla taho, jak Jeŭrapiejski sajuz uklučyŭ Kuleŭski NPZ u 21‑šy pakiet antyrasijskich sankcyj. Pavodle ŭmoŭ sankcyj, pradpryjemstva pavinna admovicca ad vykarystańnia rasijskaj nafty nie paźniej za 25 studzienia 2027 hoda.

U kampanii paviedamili, što pierapracoŭka kazachstanskaj nafty pačałasia jašče ŭ pačatku lipienia. U žniŭni zavod taksama pačnie pracavać ź livijskaj syravinaj. Čakajecca, što pieršaja partyja nafty ź Livii prybudzie ŭ Kulevi ŭ pieryjad z 20 pa 30 žniŭnia.

Pahadnieńnie ab pastaŭkach livijskaj nafty było padpisana 3 lipienia 2026 hoda. Jano budzie dziejničać da kanca 2027 hoda z mahčymaściu dalejšaha padaŭžeńnia.

Rasija ŭpieršyniu pačała pastaŭlać naftu na Kuleŭski NPZ u kastryčniku 2025 hoda. Zavod staŭ pieršym u Hruzii pradpryjemstvam poŭnaha cykłu pa pierapracoŭcy nafty. Jaho stvareńnie pavinna dapamahčy krainie źmienšyć zaležnaść ad impartu hatovych naftapraduktaŭ, jakija raniej u asnoŭnym zakuplalisia ŭ Turcyi, Azierbajdžanie, Rumynii, Rasii i Kazachstanie.

Ciapier mahutnaść pradpryjemstva składaje kala 1,2 miljona ton nafty ŭ hod. Da 2028 hoda płanujecca pavialičyć jaje da 4 miljonaŭ ton. Vypracavanyja naftapradukty buduć pastaŭlacca jak na ŭnutrany rynak Hruzii, tak i na ekspart.

Kamientary da artykuła