U Rumynii kantralavana padarvali Dunaj, kab skiravać patok vady na AES
U Rumynii armija razharnuła maštabnuju vajskova-inžyniernuju apieracyju na Dunai, kab vyratavać ad prypynieńnia atamnuju elektrastancyju «Čarnavode». Praz nadzvyčajnuju zasuchu i rezkaje padzieńnie ŭzroŭniu vady AES apynułasia pad pahrozaj niedachopu vady dla astudžeńnia reaktara.
Kab pieranakiravać račny patok u bok vadazaboru stancyi, sapiory i vadałazy 3 žniŭnia vykarystali 180 kiłahramaŭ vybuchoŭki i zmahli razburyć padvodnuju skału Pyržoaja.
Pieršaja sproba, praviedzienaja napiaredadni, zaviaršyłasia niaŭdačaj, ale padčas druhoha vybuchu kamienny masiŭ užo byŭ paśpiachova adkołaty.
Najbližejšym časam płavučy kran dastanie vializnyja abłomki z vady, paśla čaho vajskoŭcy zatopiać u hetym miescy čatyry 70‑mietrovyja baržy z kamieniem.
Takaja štučnaja damba dazvolić skiravać asnoŭny patok vady ŭ patrebny bok.
Situacyja z vodnymi resursami ŭ rehijonie nabližajecca da histaryčnaha minimumu 1985 hoda. Z-za rezkaha skaračeńnia vytvorčaści elektraenierhii ŭrad Rumynii ŭžo abviaściŭ u krainie stan nadzvyčajnaj situacyi na žnivień.
Anałahičny kryzis užo zakranuŭ i susiedniuju Vienhryju, dzie praź niedachop vady ŭ Dunai pryjšłosia častkova prypynić pracu AES «Pakš».