U Biełastoku chulihany pryčapilisia da biełaruskaj siamji i pačali jaje abražać
Natalla razam z mužam i vaśmihadovaj dačkoj viartałasia dadomu paśla prahułki, kali da ich pryčapiłasia hrupa maładych ludziej.
Biełaruskaja siamja ŭžo vosiem hadoŭ žyvie ŭ Biełastoku. Chłopcy-palaki pačali vykrykvać u ich adras ksienafobskija abrazy, piša Most.
Pra zdareńnie Natalla raskazała ŭ haradskoj supołcy Spotted Białystok, i jaje dopis vyklikaŭ šyrokuju dyskusiju. Bolšaść karystalnikaŭ padtrymała biełarusku, adnak niekatoryja ŭskłali vinu na ŭkraincaŭ.
Natalla paviedamiła, što razam z mužam i dziećmi žyvie ŭ Biełastoku ŭžo vosiem hadoŭ. Siamja viadzie ŭ horadzie ŭłasny biznes, płacić padatki i sacyjalnyja ŭznosy. Žančyna apisała niepryjemnuju situacyju, jakaja zdaryłasia adnym ź viečaroŭ naprykancy lipienia.
«My viartalisia dadomu paśla prahułki ŭsioj siamjoj, u tym liku z vaśmihadovaj dačkoj. Kala vuhła našaha doma stajali chłopcy. Kali my spynilisia i ja źviarnułasia da muža pa imieni, jany paviarnulisia da nas i pačali pavodzić siabie vulharna. Kryčali: «Sp**dalaj na Ukrainę». Vykrykvali łajanku i inšyja abrazy», — napisała Natalla.
Na vyhlad, pavodle jaje słoŭ, maładym ludziam było kala 19—20 hadoŭ — «amal dzieci». Adzin ź ich padskočyŭ da jaje muža, pačaŭ jaho pravakavać i pahražać.
Natalla patelefanavała ŭ palicyju, paśla čaho maładyja ludzi ŭciakli.
«Chaču skazać niekalki słoŭ baćkam, jakija vychavali hetych dziaciej. Spadziajusia, što kali vam abo vašym dzieciam kaliści daviadziecca źjechać u inšuju krainu, bo vas niešta nie zadavolić abo vy nie pahodziciesia z tym, što adbyvajecca ŭ vašaj dziaržavie, nivodzin žychar toj krainy nie skaža ni vam, ni vašym dzieciam taho, što siońnia pačuła ja», — napisała biełaruska.
«Idyjota nie pierakanaješ ni ŭčynkam, ni słovam»
Pad dopisam Natalli razharnułasia aktyŭnaja dyskusija — za dva dni karystalniki pakinuli bolš za 450 kamientaryjaŭ. Bolšaść žycharoŭ Biełastoka padtrymała biełaruskuju siamju.
«Vielmi škada. Ja žyvu za miažoj užo 34 hady, i choć ja polka, mnie nikoli nichto nie kryčaŭ, kab ja «pravalvała» ŭ Polšču. Ad usiaho serca prašu ŭ vas prabačeńnia za ich! Ja taksama ź Biełastoka, lublu hety horad, ale ciapier navat strašnavata tudy viartacca», — napisała Elžbieta.
«Heta vielmi sumnaja i niepryjemnaja historyja. Ale ŭ kožnaj krainie jość takija ludzi, i heta nie aznačaje, što ŭsie my takija. Spadziajusia, što zvyčajna vy sustrakajecie tolki dobrazyčlivaje staŭleńnie. Usiaho vam najlepšaha i niachaj takoje bolš nikoli nie paŭtorycca», — adznačyła Jałanta.
«Idyjota nie pierakanaješ ni ŭčynkam, ni słovam. Prosta žyvicie dalej i nie źviartajcie ŭvahi na pavodziny nieadekvatnych ludziej. Abdymaju vas i ŭsiu vašu siamju ad usiaho serca. Ja choć i nie ź Biełastoka, ale žyvu niedaloka. Paviercie, narmalnych biełastačan vielmi šmat», — napisała Kasia.
«Takija dzikuny zaŭsiody znojduć nahodu, kab da niekaha pryčapicca. Pra takich treba paviedamlać u palicyju, a jašče lepš — sfatahrafavać ich, kab było viadoma, kaho šukać», — paraiła Elžbieta.
«Natalla, viedaju, što mnie lohka heta pisać, ale nie prymajcie blizka da serca pavodziny marhinałaŭ i durniaŭ», — adznačyŭ Marcin.
«Mnie soramna», — napisała inšaja karystalnica.
«U luby momant možaš źjechać dalej abo viarnucca ŭ Biełaruś»
Adnak pad dopisam źjavilisia i varožyja kamientaryi.
«Heta pałka z dvuma kancami: jak pavodziać siabie ŭ nas biełarusy i ŭkraincy, tak im i adkazvajuć palaki», — napisaŭ Tomaš.
«Nie padabajecca? U luby momant možaš pajechać dalej abo viarnucca ŭ Biełaruś. Zamiest taho kab skardzicca», — zajaviŭ Piotr.
Častka kamientataraŭ abvinavačvaje va ŭsim ukraincaŭ, śćviardžajučy, što jany drenna pavodziać siabie ŭ Polščy.
«Jany prosta nie zrazumieli, što vy ź Biełarusi. A što da ŭkraincaŭ, uspomnicie, jak palaki sustreli ich paśla pačatku vajny. Za hetyja čatyry hady ŭkraincy sami zasłužyli takoje staŭleńnie», — ličyć Andžej.
«Mnie vielmi škada. My lubim biełarusaŭ. Ale praz pastajannyja pravakacyi ŭkraincaŭ hetyja maładyja ludzi byli złymi i pavodzili siabie nachabna, bo my ŭsie stamilisia ad hetych banderaŭcaŭ. Vam prosta dastałasia pamyłkova», — napisała Evielina.
«Viedaju, što heta hłupstva i tak nie pavinna być, ale kali b vy adrazu skazali, što vy ź Biełarusi, ničoha b nie zdaryłasia, bo ŭsia sprava tolki va ŭkraincach», — ličyć Anžalika.
«Treba było adrazu skazać, što vy biełarusy, a nie ŭkraincy. Dumaju, heta vielmi chutka spyniła b kanflikt», — paraiła Eva.