Što na mohiłkach pavinny prybirać kamunalniki, a što svajaki
Zaniadbany stan mohiłak kala pasiołka Śvisłač Puchavickaha rajona vyklikaŭ abureńnie miascovych žycharoŭ: ludzi skardziacca na zaraśniki, adsutnaść vady i śmiećcievych kantejnieraŭ. Adnak u kamunalnaj słužbie zajaŭlajuć, što zony adkaznaści na mohiłkach padzieleny.
U redakcyju «Minskaj praŭdy» źviarnułasia žycharka pasiołku Družny Puchavickaha rajona. Pavodle jaje słoŭ, za mohiłkami pablizu haradskoha pasiołku Śvisłač nichto nie sočyć.
Pavodle słoŭ žančyny, mohiłki znachodziacca ŭ zapuścieńni.
«My ich u narodzie zaviom Dukorskija. Kolki prasili pobač z mohiłkami ŭstanavić kantejniery dla śmiećcia, pastavić kałonku, kab ludzi mahli pamyć ruki ci pomniki — ničoha nie robiać. Jak jedziem na mohiłki — piacilitrovuju butlu vałačom z saboj. My ž nie maładyja ludzi! Nam ciažka! Sumnik raście — jaho treba abo kasić, abo trucić. Źmiei vodziacca ŭ hetaj raślinnaści — chadzić strašna. Kolki budziem dabivacca paradku?!» — aburajecca žančyna.
Dyrektar UP «Žyłciepłaservis» KH Puchavickaha rajona Siarhiej Chiendohin rastłumačyŭ, jak raźmiažoŭvajucca abaviazki pa ŭparadkavańni.
Kamunalnyja słužby adkazvajuć vyklučna za miescy ahulnaha karystańnia. Kamunalniki abkošvajuć asnoŭnyja prachody i terytoryju vakoł mohiłak, prybirajuć suchija haliny dy vyvoziać śmiećcie z kantejnieraŭ.
Svajaki pamierłych abaviazany dahladać sami mahiły i terytoryju vakoł ich.
«Za stan mahiły adkazvajuć ludzi, jakija arhanizavali pachavańnie abo ŭstanoŭku pomnika, — jany pryznajucca faktyčnymi ŭładalnikami ŭčastka i abaviazany sačyć za jaho ŭtrymańniem», — padkreślivajuć u arhanizacyi sa spasyłkaj na Pastanovu Ministerstva ŽKH № 17.
Što ŭvachodzić u abaviazki svajakoŭ:
- rehularna prybirać śmiećcie, staryja vianki i apałaje liście;
- nie dapuskać zarastańnia ŭčastka travoj i pustaziellem;
- abkošvać i prybirać nie tolki sam učastak, ale i prachody pamiž susiednimi mahiłami.
Na pretenzii ŭ ŽKH dadali, što Dukorskija mohiłki apošni raz abkošvalisia 17 lipienia, kantejniery dla śmiećcia tam ustanoŭleny, a voś padviadzieńnie vady i kałonki hienieralnym płanam vykarystańnia abjekta nie praduhledžany.