Za try miesiacy hruzinskija ŭłady vysłali 16 biełaruskich hramadzian — novy rekord
Rekordnuju kolkaść biełaruskich hramadzian — 16 — vysłali ŭ druhim kvartale 2026 hoda ŭłady Hruzii, śviedčyć praviedzieny «Pozirkam» analiz źviestak miascovaj palicyi. Heta ŭdvaja bolš, čym u pieršym kvartale, što na toj momant taksama było rekordam, paviedamlaje «Pozirk».
Tbilisi. Fota: vecteezy.com
Za krasavik — červień z Hruzii vysłana 15 mužčyn i adna žančyna.
Takim čynam, za paŭhodździe Hruzija, jakoj z 2012 hoda kiruje partyja prarasijskaha aliharcha Bidziny Ivanišvili, vysłała 24 hramadzianina Biełarusi. Heta 1,18% usich zamiežnikaŭ, vysłanych z krainy za nazvany pieryjad.
12 biełarusaŭ (usie — mužčyny) u druhim kvartale 2026 hoda było źmieščana ŭ centr časovaha ŭtrymańnia, śviedčać źviestki palicyi.
U 2025 hodzie Hruzija vysłała 6 biełaruskich hramadzian (usie — mužčyny), što stała hadavym rekordam.
Za papiarednija šeść hadoŭ (2019-24) z hetaj krainy było vysłana try hramadzianina Biełarusi.
Ahulnaja statystyka śviedčyć ab aktyvizacyi hruzinskich siłavikoŭ: u 2021 hodzie było vysłana 77 zamiežnikaŭ, u 2022‑m — 165, u 2023‑m — 190, u 2024‑m — 363, u 2025‑m — 1311.
Hruzija stała adnoj z asnoŭnych krain znachodžańnia biełarusaŭ, jakija ŭciakli ad pieraśledu režymam Łukašenki ŭ 2020 hodzie i paźniej. Miascovyja ŭłady nie zadavolili nivodnaha ich chadajnictva ab nadańni prytułku.