Biełaruskija viaślarki vyjhrali zołata čempijanatu Jeŭropy
Biełaruskija viaślarki Taćciana Klimovič i Alena Furman stali čempijonkami Jeŭropy ŭ akademičnym viesłavańni ŭ dyscyplinie «dvojka parnaja». Spabornictvy prachodziać u italjanskim Vareze, paviedamlaje BiełTA.
Fota: NAK Biełarusi
U finalnym zajeździe žanočych dvuchmiesnych ekipažaŭ udzielničali kamandy ź Biełarusi, Šviejcaryi, Litvy, Hiermanii, Hrecyi i Vialikabrytanii.
Paśla pieršaj pałovy dystancyi biełaruski spartsmienki išli trecimi, ale na druhoj častcy zajezdu zmahli značna dadać u tempie i ŭ vyniku pieršymi pierasiekli finišnuju liniju. Srebra zavajavali hreckija viaślarki Dzimitra Kontu i Jevanhielija Anastasijadu, jakija adstali ad biełarusak na 1,32 siekundy. Treciaje miesca zaniali pradstaŭnicy Litvy Marcina Kazłaŭskajcie i Davile Rymkucie.
Dla Aleny Furman hetaja pieramoha stała piataj na čempijanatach Jeŭropy. Raniej jana stanaviłasia čempijonkaj u adzinočcy ŭ 2018, 2021 i 2024 hadach, a taksama ŭ dvojcy parnaj u 2019 hodzie. Ciapier da hetych tytułaŭ dadałasia jašče adna załataja ŭznaharoda.
Letaś Klimovič i Furman razam zavajavali bronzavyja miedali čempijanatu śvietu ŭ hetaj samaj dyscyplinie.
Zaŭtra biełaruskija spartsmieny pavinny vystupić jašče ŭ troch finałach jeŭrapiejskaha pieršynstva: u mužčynskaj adzinočcy (Jaŭhien Załaty), žanočaj lohkaj adzinočcy (Valeryja Šendel) i mužčynskaj vaśmiorcy z rulavym.
Čytajcie taksama:
Vychavaciela vučylišča alimpijskaha reziervu z Mazyra asudzili za zamach na zdradu dziaržavie
Biełaruski viaślar zavajavaŭ załaty miedal na čempijanacie Jeŭropy
Bolš za 100 tysiač narviežcaŭ zładzili firmovaje viesłavańnie prosta ŭ centry Osła