Va Ukrainie na zapyt ZŠA aryštavali hramadzianina Biełarusi, jakoha padazrajuć u kibierzłačynstvach

Jak stała viadoma «Radyjo Svaboda» ź infarmavanych krynic, hramadzianina Biełarusi zatrymali 7 lipienia ŭ vioscy Višańki Baryspalskaha rajona Kijeŭskaj vobłaści, dzie jon žyŭ. Biełarus budzie znachodzicca pad ekstradycyjnym aryštam va Ukrainie jak minimum da 9 vieraśnia. Da faktyčnaj vydačy ŭładam ZŠA jaho buduć utrymlivać u Kijeŭskim śledčym izalatary.

Zdymak ilustracyjny. Fota: magnific.com

Biełarusa zatrymlivała hrupa supracoŭnikaŭ Słužby biaśpieki Ukrainy na padstavie zapytu ZŠA ab jahonym aryšcie jak asoby, jakuju chočuć pryciahnuć da kryminalnaj adkaznaści za złačynstvy, źviazanyja z udziełam u raspaŭsiudzie škodnych rekłamnych abviestak, što vykarystoŭvali dla kibierzłačynnaj dziejnaści. Ordar na jahony aryšt 10 červienia 2025 hoda vydaŭ adzin z akruhovych sudoŭ u ZŠA.

U Amierycy hramadzianinu Biełarusi vystavili padazreńni pavodle artykułaŭ 371, 1343, 1349 i 3559 (g) (papiaredniaja zmova ŭ metach učynieńnia machinacyi z vykarystańniem elektronnych srodkaŭ suviazi i kampjutarnych pryład, a taksama ŭłasna sami machinacyi). U ZŠA hramadzianinu Biełarusi moža pahražać ad 5 da 20 hadoŭ źniavoleńnia. Jamu inkryminujuć pravaparušeńni, jakija jon učyniaŭ z kastryčnika 2013 hoda da krasavika 2023 hoda.

Proźvišča zatrymanaha hramadzianina Biełarusi nie nazyvajuć.

U rozny čas u Amierycy pavodle anałahičnych abvinavačańniaŭ asudzili, zatrymali i vyšukvajuć niekalki hramadzian Biełarusi:

• Maksim Silnikaŭ (Silčanka) znachodzicca pad aryštam u turmie štata Ńju-Džersi ŭ čakańni zaviaršeńnia sudovaha pracesu;
• Pavieł Dźmitrenka adbyvaje pakarańnie ŭ fiederalnaj turmie ŭ štacie Techas — jamu prysudzili 51 miesiac źniavoleńnia. Paśla hetaha jaho departujuć u Biełaruś;
• Alaksandr Klimienka zatrymany ŭ Łatvii i ekstradavany ŭ ZŠA ŭ pačatku 2024 hoda;
• Uładzimir Kadaryja (viadomy taksama pad imionami Andrej Kavaloŭ, «Stalin», baxus) znachodzicca ŭ śledčym izalatary ŭ Biełarusi. Jaho zatrymali ŭ Kyrhyzstanie i ŭ sakaviku 2023 hoda ekstradavali ŭ Biełaruś;
• Siarhiej Dzienisienka abvieščany ŭ mižnarodny vyšuk, pavodle niekatoraj infarmacyi, jon moža znachodzicca na terytoryi Rasii;
• Ihar Turašaŭ taksama znachodzicca na svabodzie, imavierna, u Rasii. Suprać jaho ŭviali sankcyi i abviaścili ŭznaharodu ŭ pamiery 5 miljonaŭ dalaraŭ za dapamohu ŭ jahonym zatrymańni.

Kamientary da artykuła