U Pampiejach adnavili rośpis sklapieńniaŭ, jakich nie isnuje ŭžo dva tysiačahodździ
Amal dźvie tysiačy hadoŭ tamu raśpisnyja sklapieńni bankietnaj zały pampiejskaj viły abrynulisia pad nievynosnym ciažaram vułkaničnaha popiełu i kamianioŭ. Italjanskija restaŭratary zdoleli pa kavałkach sabrać ich u adzinuju kampazicyju, śviadoma pakidajučy prahały dla frahmientaŭ, što jašče čakajuć svajho času ŭ ziamli.
Kamanda restaŭrataraŭ pracuje nad macavańniem i ačystkaj frahmientaŭ na vyhnutaj modulnaj ramie, jakaja paŭtaraje formu aryhinalnaj stoli. Fota: Parco Archeologico di Pompei
Jak piša vydańnie The New York Times, navukoŭcy prezientavali adnoŭlenuju fresku z tak zvanaha Doma ź piakarniaj (Casa con Panificio), raźmieščanaha ŭ dziaviatym rajonie Pampiej. Kaliści hety manumientalny žyvapis azdablaŭ stol bankietnaj zały na vierchnim paviersie bahataj viły, jakaja, imavierna, naležała miascovamu mahistratu Aŭłu Ruściju Vieru. U 79 hodzie našaj ery vyviaržeńnie Viezuvija pieratvaraje raskošnyja interjery ŭ druz, pieramiašany z popiełam.
Stoli rymskich damoŭ zvyčajna rabilisia ŭ vyhladzie falšyvych sklapieńniaŭ: draŭlany karkas abšyvali tryśniahom i pakryvali tynkoŭkaj, na jakuju ŭžo nanosili malunak. Arhaničnaja asnova ŭraźlivaja da hnijeńnia i pažaraŭ, tamu zachavanyja antyčnyja stoli — heta vyklučnaja archieałahičnaja redkaść. Siońnia viadoma tolki kala dvuch dziasiatkaŭ padobnych abjektaŭ.
Sabranaja z asobnych askiepkaŭ častka freski z vyjavaj žanočaj fihury. Fota: Parco Archeologico di Pompei
Taja ž fihura, pieraniesienaja na ramu ŭ atačeńnie z hrateskaŭ: vyjavaŭ rakavin, ptušak i raślinnych matyvaŭ. Fota: Parco Archeologico di Pompei
Na sabranym z tysiačy kavałkaŭ pałatnie razhortvajecca scena ijerahamii — śviaščennaha šlubu Dyjanisa i Aryjadny. Boh vinarobstva spačyvaje na kalaśnicy, zaprežanaj dvuma kientaŭrami-muzykantami, pakul kryckaja pryncesa hraje na arfie pad akampaniemient Erota. Antyčnyja majstry ščodra azdobili centralnaje pano raślinnymi hirlandami, fihurami kryłatych hienijaŭ i rytualnymi pasudzinami, stvaryŭšy idealnaje atačeńnie dla biaskoncych zastollaŭ.
Ahulny vyhlad modulnaj ramy z zamacavanymi frahmientami. Na hety momant adnoŭlena kala čverci pieršapačatkovaj płoščy sklapieńnia. Fota: Parco Archeologico di Pompei
Kamanda restaŭrataraŭ pracuje nad macavańniem i ačystkaj frahmientaŭ na vyhnutaj modulnaj ramie, jakaja paŭtaraje formu aryhinalnaj stoli. Fota: Parco Archeologico di Pompei
Hałoŭny vyklik dla restaŭrataraŭ zaklučaŭsia nie ŭ kolkaści detalaŭ, a ŭ hieamietryčnych asablivaściach sklapieńniaŭ. Sabrać płoskuju mazaiku zdolny luby daśledčyk z dobraj matorykaj i zapasam ciarpieńnia, ale sklapieńnie Doma ź piakarniaj mieła składanuju vyhnutuju formu. Kab viarnuć frescy aryhinalnuju abjomnaść, italjanskija inžyniery admovilisia ad standartnych płoskich ščytoŭ.
Schiema centralnaj kampazicyi (kalaśnica Dyjanisa i kientaŭry) z nakładzienymi na jaje aryhinalnymi frahmientami tynkoŭki. Fota: Parco Archeologico di Pompei
Detal freski z pramavuholnaj ustaŭkaj, jakaja pakazvaje siužetnuju scenu. Fota: Parco Archeologico di Pompei
Paralelna z ačystkaj i sartavańniem askiepkaŭ jany raspracoŭvali inavacyjnuju modulnuju ramu. Hetaja kanstrukcyja źmianiała svaje abrysy litaralna ŭ pracesie pracy: tolki pastupovaja stykoŭka aryhinalnych frahmientaŭ dazvalała dakładna vyličyć radyus vyhibu staražytnaj stoli. Kožny novy kavałak tynkoŭki dyktavaŭ sučasnym technikam formu padtrymlivajučaha karkasa. U vyniku była stvorana ŭnikalnaja matryca, jakaja paŭtaraje histaryčnuju formu.
Frahmient rośpisu stoli z vyjavaj hieamietryčnych arnamientaŭ, hrateskaŭ i mifałahičnych fihur. Fota: Parco Archeologico di Pompei
Siońnia śpiecyjalistam udałosia adnavić tolki kala čverci pieršapačatkovaj kampazicyi. Mnostva identyfikavanych frahmientaŭ usio jašče lažać u łabaratornych skryniach, a sotni inšych čakajuć svajho adkryćcia ŭ nieraskapanych pakojach viły. Modulnaja sistema macavańnia maje jašče adnu stratehičnuju funkcyju — jana adkrytaja dla budučych dapaŭnieńniaŭ.
Modulnaja kanstrukcyja z adnoŭlenym sklapieńniem vystaŭlenaja ŭ Vialikaj palestry Pampiej. Restaŭracyjnyja pracy praciahvajucca ŭ prysutnaści naviedvalnikaŭ. Fota: Parco Archeologico di Pompei
Restaŭratar apracoŭvaje frahmienty freski achoŭnym składam (mikrakryštaličnym voskam) dla kansiervacyi. Fota: Parco Archeologico di Pompei
Restaŭratary nie imknulisia imitavać zavieršanaść. Novaja rama dazvalaje ŭ luby momant dadavać śviežaznojdzienyja kavałki ŭ ahulnuju mazaiku biez demantažu papiarednich. Praces adnaŭleńnia budzie doŭžycca hadami, idučy śledam za chodam raskopak.
Adrestaŭravanaja častka freski ŭžo vystaŭlenaja dla ahladu ŭ Vialikaj palestry Pampiej.